QR UQK Shekara akademııasynda jas túlekterdi shyǵaryp salý rásimi ótti
ASTANA. QazAqparat - QR Ulttyq qaýipsizdik komıteti Shekara akademııasynda jas túlek ofıtserlerdi shyǵaryp salý rásimi bolyp ótti.
Jas ofıtserlerdi QR UQK Tóraǵasynyń orynbasary - Shekara qyzmetiniń dırektory general-leıtenant Nurlan Jolamanov akademııadaǵy oqýlarynyń aıaqtalýymen quttyqtady. Memlekettik shekarany kúzetetin ofıtserlerdi daıyndaıtyn osy oqý ordasynyń túlekteriniń arasynan bolashaqta komandırler men generaldardyń shyǵatyndyǵyna senim bildirdi.
- Sender Otanǵa adal qyzmet etýdiń, ofıtserlik ar-namystyń úlgisin kórsetýleriń kerek, - dep atap ótti general-leıtenant Nurlan Jolamanov.
Bıylǵy jyly Shekara qyzmetiniń ofıtserlik quramy 250 túlekpen tolyǵatyn bolady, olardyń arasynda 14 leıtenant akademııany úzdik baǵamen aıaqtady, al Astana kúni qarsańynda memlekettik shekara saqshylarynyń 5-ýi «leıtenant» áskerı shenin Qazaqstan Respýblıkasynyń Prezıdenti Nursultan Ábishuly Nazarbaevtyń óz qolynan alý qurmetine ıe bolyp otyr. Jas leıtenanttardyń 28-iniń taıaý shyǵys elderinen kelýi Qazaqstan Respýblıkasynyń halyqaralyq yntymaqtastyqty nyǵaıtýǵa qosyp kele jatqan naqty isiniń dáleli bolyp tabylady. Sondaı-aq, 17 tyńdaýshynyń bir jyldyq kýrsty bitirgendigin de atap ótken oryndy.
Merekelik is-shara ádettegishe jas leıtenanttardyń ofıtserlik vals bıleýimen ashyldy. Saptyq jattyǵýlar ótetin alańda túlekterden quralǵan 60 jup dóńgelenip bıge shyqty. Odan keıin 3-oqý dıvızıonynyń kýrsanttary qarý-jaraqty qalaı meńgergendikterin is júzinde kórsetti. Árıne, búgingi kúnniń basty talaby - oqý barysynda tájirıbege meılinshe zor kóńil bólý. Sonyń nátıjesinde Shekara akademııasynyń búgingi túlekteri qarý-jaraqtyń barlyq túrin meńgerip otyr, shekara vedomstvosynyń sapynda turǵan áskerı jáne avtomobıldik tehnıkanyń barlyǵyn júrgize alady, qyzmettik ıttermen jumys isteý tásilderin úırengen.
Qonaqtar aldynda túlekter shekara buzýshy adamdy qoıan-qoltyq urys tásilderin qoldana otyryp qalaı ustaıtyndyqtaryn kórsetti.
Shekarashy-ofıtserlerdi daıyndaıtyn QR UQK Shekara akademııasy Qazaqstan Respýblıkasynda ǵana emes, sonymen qatar TMD elderi úshin de bedeldi oqý ordasy bolyp tabylady, dep habarlaıdy QR UQK ShQ baspasóz qyzmeti.
