QR UQK ókilderi úsh qalada arnaıy operatsııa júrgizip, 16 tonna esirtki tárkiledi

ASTANA. QazAqparat - Ulttyq qaýipsizdik komıteti elimizdiń óńirlerinde iri kólemde kóknár shıkizatyn satý qylmysyna qatysy bar esirtkimen aınalysatyn toptyń jolyn kesýge baǵyttalǵan arnaıy operatsııa júrgizdi.

QR Ulttyq qaýipsizdik komıteti baspasóz qyzmetiniń habarlaýynsha, jedel zerdeleý jumysynyń nátıjesinde Petropavl qalasynda esirtki qylmysyna qatysty toptyń kómekshileri ustalyp, 5,5 tonnaǵa jýyq apıyn alyndy.

Osy operatsııanyń ekinshi kezeńi barysynda Óskemen qalasynda 1 tonna kóknár shıkizatyn alý ústinde esirtki kýreri ustaldy. Dál osy ýaqytta, Qaraǵandy qalasynda jalǵa alǵan qoımalarda 10 tonnadan asa esirtki shıkizatyn saqtap kelgen esirtki qylmysyna qatysty toptyń uıymdastyrýshylary ustaldy.

Buǵan qosa tintý sharalary barysynda esirtki qylmysyna qatysty top qatysýshylarynan jaraqattaýshy jáne sýyq qarý, sonymen qatar iri kólemde aqsha tabylyp, alyndy.

Aldyn ala tergeý anyqtaǵandaı, atalǵan apıyn tamaq ónimderi túrinde shetelden Qazaqstan aýmaǵyna kirgizilip, esirtkige táýeldi ortada saýdalanǵan.

«Jalpy qolǵa túsken esirtki kólemi 16 tonnadan asty. Odan ári jedel-tergeý amaldary júrgizilýde. Esirtki bıznesine qarsy kúres jumysy jalǵasýda»,-delingen QR UQK baspasóz qyzmeti taratqan aqparatta.

Foto: gov.kz