QR UQK-niń ókilderi esirtkini onlaın saýdalaýshylardyń jolyn kesti
ASTANA. QazAqparat - Ulttyq qaýipsizdik komıtetiniń ókilderi esirtkiniń onlaın saýdasyn júzege asyryp kelgen uıymdasqan qylmystyq top ókilderin quryqtady. Bul týraly QR Ulttyq qaýipsizdik qyzmetiniń baspasóz qyzmeti taratqan málimetterden belgili boldy.
«2017 jylǵy 26-27 qyrkúıekte Qazaqstan Respýblıkasy Ulttyq qaýipsizdik komıtetiniń kıberqaýipsizdik, esirtki quraldarynyń zańsyz aınalymymen kúres jáne arnaıy jasaq bólimsheleriniń birlesken kúshimen Astana jáne Almaty qalalarynda UQK kıber bólimsheleriniń qatysýymen «Dark net, Deep web» ǵalamtor-jelileriniń kóleńkeli segmentiniń múmkindikterin qoldana otyryp, esirtki quraldary men psıhotroptyq/sıntetıkalyq zattardy taratýmen aınalysqan 2 uıymdasqan qylmystyq toptyń is-áreketiniń jolyn kesýge baǵyttalǵan keń aýqymdy arnaıy operatsııa ótkizildi»,-delingen UQK-niń baspasóz málimetterinde.
Onda sondaı-aq jabyq veb-keńistikti monıtorıngileý barysynda satyp alýshylarmen onlaın-rejımde esirtki quraldary jáne psıhotroptyq zattar satyp alynyp otyrǵan jekelegen ǵalamtor-dúkenderi anyqtalǵandyǵy aıtylǵan.
«QIWI-koshelekterge» aqsha qarajattaryn aýdarý jolymen esirtki zattaryna tólemder alǵannan keıin, saıt ákimshileri esirtki satyp alýshylarǵa tyıym salynǵan zattardyń jasyryn oryndaryn habarlap otyrǵan.
Odan ári júrgizilgen jedel-izdestirý is-sharalary barysynda Almaty jáne Aqtóbe qalalarynda osyǵan uqsas jolmen esirtki quraldary men psıhotroptyq zattardy taratýmen aınalysqan ońtústik astananyń eki turǵyny anyqtalǵan.
«2017 jylǵy 3 qarashada Ulttyq qaýipsizdik komıteti kórsetilgen tulǵalardy Almaty qalasynda ustady. Ótkizilgen is-sharalar nátıjesinde barlyǵy 12 esirtki satýshynyń qylmystyq is-áreketiniń joly kesildi. Sonymen birge joǵaryda atalǵan saıttardy esirtki zattaryn alý úshin paıdalanǵan adamdardy anyqtaý boıynsha tıisti jedel-tergeý is-áreketteri jalǵasýda»,-dep habarlady baspasóz qyzmeti.
