QR UQK esirtki saýdasymen aınalysatyn topty quryqtady
ASTANA. QazAqparat - QR Ulttyq qaýipsizdik komıteti kópkezeńdi arnaıy operatsııa ótkizdi. Onyń barysynda esirtki saýdasymen aınalysatyn toptyń qylmystyq áreketiniń joly kesilip, 97 kg marıhýana tárkilendi, dep habarlaıdy QazAqparat.
«Atalǵan fakti boıynsha QR UQK Almaty qalasy boıynsha departamentinde QR QK-niń 297-baby 3-bóligi boıynsha qylmystyq is qozǵaldy. Ustalǵan tulǵalar qazirgi tańda tergeý ızolıatoryna qamaldy. Sotqa deıingi tergep-tekserý amaldary júrgizilýde», - delingen UQK aqparatynda.
Vedomstvodan málim etkendeı, 2018 jyly UQK Almaty qalasy aýmaǵynda esirtkiniń zańsyz aınalymyna qatysty 14 faktini, halyqaralyq deńgeıdegi zańsyz aınalym boıynsha 5 faktini anyqtady.
«Nátıjesinde, 36 qylmystyq is qozǵaldy. Zańsyz aınalymnan 84 kg esirtki jáne júıkege áser etetin zattar, onyń ishinde 74 kg geroın jáne 8 kg sıntetıkalyq esirtki zattary tárkilendi. Esirtkini kontrabandalyq jolmen zańsyz tasymaldaý, sondaı-aq ultaralyq qylmystyq toptarǵa qatysý faktileri boıynsha 12 adam ustaldy. Onyń ishinde eki sheteldik azamat qylmystyq jaýapkershilikke tartyldy», - dedi baspasóz qyzmetinen.
Atap ótilgendeı, esirtki zattary Qazaqstan aýmaǵyna kontrabandalyq jolmen Eýroodaq, Reseı, AQSh, Meksıka jáne Qytaı elderinen halyqaralyq poshta jóneltilimderi jáne logıstıkalyq kompanııalar arqyly keledi.
«Ótken jyly sheteldik seriktestiktermen birge 3 halyqaralyq operatsııa ótkizildi. Zańsyz aınalymnan 1056 MDMA tabletkasy jáne 0,2 kg sıntetıkalyq esirtki zaty tárkilendi. Júıkege áser etetin esirtki zatyn jasyryn zerthanalarda daıyndaıtyn jáne olardy ınternet-resýrstar arqyly taratýmen aınalysatyn qylmystyq toptyń is-áreketine tosqaýyl qoıyldy. Zańsyz aınalymnan 5 gk astam sıntetıkalyq esirtki zaty jáne 500 kg hımııalyq qospa tárkilendi», - dedi QR UQK-dan.
