QR UQK eks-tóraǵasy Kárim Másimov aqsha jymqyrdy jáne asa iri kólemde para aldy degen kúdikke ilindi

Ulttyq qaýipsizdik komıteti Kazinform agenttigine Kárim Másimovke qatysty jańa qylmystyq ister tergelip jatqanyn habarlady.

- Kárim Másimovke qatysty QR QK 218-baby «Qylmystyq jolmen alynǵan aqshany jáne (nemese) ózge múlikti zańdastyrý (jylystatý)» jáne 366-baby «Asa iri kólemde para alý» boıynsha sotqa deıingi tergeý júrip jatyr», - delingen QR UQK saýalǵa jaýabynda.

Sol sebepti Qylmystyq-atqarý kodeksiniń 92-baby, 3-bóligi boıynsha Kárim Másimov prokýratýra sanktsııasynan qylmystyq is aıasynda tergeý amaldaryn júrgizý maqsatynda Astana qalasy UQK tergeý ızolıatorynda qaldy.

Buǵan deıin K.Másimov pen A.Sadyqulovqa memleketke opasyzdyq jasaý, bılikti kúshpen basyp alý, bılik pen laýazymdyq ókilettigin asyra paıdalaný, D.Erǵojınge bılikti kúshpen basyp alý, bılik pen laýazymdyq ókilettigin asyra paıdalaný, M.Osıpovke bılik pen laýazymdyq ókilettigin asyra paıdalaný aıyby taǵylǵan.

2023 jyldyń 10 naýryzynda UQK baspasóz qyzmeti Másimov Premer-Mınıstr bolǵan kezde bıznes-qurylymdardyń birinen quny 2,5 mlrd teńge bolatyn Astanadan sáýletti qonaqúı men jer telimin alǵanyna qatysty tergeý júrip jatqanyn habarlady.

2023 jyldyń 24 sáýirinde Astana qalasynyń qylmystyq ister jónindegi mamandandyrylǵan aýdanaralyq soty Ulttyq qaýipsizdik komıtetiniń burynǵy tóraǵasy Kárim Másimovke jáne onyń orynbasarlary A.Sadyqulovqa, D.Erǵojınge, M.Osıpovke qatysty qylmystyq is boıynsha úkimin jarııa etti.

K.Másimov - 18, A.Sadyqulov - 16 jylǵa, D.Erǵojın taǵylǵan aıyptarǵa sáıkes - 15 jylǵa, M.Osıpov bolsa bılik pen laýazymdyq ókilettigin asyra paıdalaný babymen 3 jylǵa bas bostandyǵynan aıyryldy. Sottalýshylardyń barlyǵy ómir boıy memlekettik qyzmette laýazym ıelene almaıdy. Sonymen qatar barlyǵy general shenderinen jáne memlekettik nagradalarynan aıyryldy.

Munan bólek, sottalýshylardan memleket kirisine 10 mlrd teńgeden astam qarjy jáne 24 mln AQSh dollary óndirip alyndy.