QR UQK Almaty qalasy boıynsha departamenti lańkestik qaýiptilikke baılanysty turǵyndardy qyraǵy bolýǵa shaqyrady
ALMATY. QazAqparat - QR UQK Almaty qalasy boıynsha departamenti Qazaqstanda lańkestik qaýiptiliktiń «sary» deńgeıiniń bekitilýine baılanysty, turǵyndardy qyraǵy bolýy jáne tártip saqshylarynyń tekserý jumystaryna túsinistikpen qaraýǵa shaqyrdy.
«5-6 maýsym aralyǵynda Aqtóbe oblysynda sodyrlardyń kózin joıý boıynsha lańkestikke qarsy operatsııa júrgizilip jatyr. Oryn alǵan jaǵdaıǵa baılanysty, lańkestikke qarsy kúres boıynsha Respýblıkalyq jedel shtabtyń jetekshisi - QR UQK tóraǵasy, general-leıtenant Vladımır Jumaqanov Almaty, Aqmola, Aqtóbe, Atyraý, Shyǵys Qazaqstan, Batys Qazaqstan, Jambyl, Qaraǵandy, Qyzylorda, Qostanaı, Mańǵystaý, Pavlodar, Soltústik Qazaqstan jáne Ońtústik Qazaqstan oblystary jáne Almaty men Astana qalalarynda 40 kúnge lańkestik qaýiptiliktiń ortasha «sary» deńgeıin bekitti», - delingen QR UQK Almaty qalasy boıynsha departamentiniń búgingi habarlamasynda.
Bul sheshim QR Prezıdentiniń 2013 jyly 9 tamyzdaǵy №611-shi Jarlyǵymen bekitilgen, aqparattarǵa memlekettik monıtorıng jasaý jáne lańkestik qaýiptiliktiń týyndaýy týraly turǵyndardy habardar etý júıesin uıymdastyrý jáne júzege asyrý Erejesiniń 4-shi taraýyna negizdeldi. Sonymen qatar, QR UQK Almaty qalasy boıynsha departamenti turǵyndardy qyraǵylyqqa shaqyrdy.
«Memlekettik organdardyń júrgizip jatqan jumystaryna túsinistikpen qaraýǵa shaqyramyz. Qaraýsyz qalǵan zattarǵa (sómkeler, qoraptar, túıinshekter, qaptar, shabadandar jáne basqa da zattar), ásirese symdary jáne tehnıkalyq qurylǵylary bar zattarǵa, sondaı-aq, qoǵamdyq oryndarda jáne kólikterde kúdik týǵyzǵan adamdarǵa nazar aýdarý qajet. Kúdikti zattarǵa jaqyndaýǵa bolmaıdy. Ásirese, beıtanys adamdar usynǵan kúdikti zattardy saqtaýdan jáne tasymaldaýdan bas tartqan abzal.
Tártip saqshylarynyń qujat tekserý boıynsha júrgizgen jumystaryna túsinistikpen qaraýǵa jáne olarǵa kómek kórsetýge shaqyramyz. Úreıge boı aldyrmańyzdar jáne memlekettik organdardyń resmı aqparatyn ǵana basshylyqqa alý kerek», - delingen habarlamada.
