QR UQK: 60 bala qaqtyǵys aýmaqtarynan elge qaıtaryldy
«Belsendi terrorıstik aýmaqtardan oralǵan adamdarmen, onyń ishinde balalarmen de júıeli túrde deradıkalızatsııa jumystary bastaldy. Osy maqsatta QR Bilim jáne ǵylym mınıstrligine qarasty Antıterrorlyq ortalyqtyń bastamasymen, terrorıstik aýmaqtarda bolǵan balalardy ońaltýǵa baǵyttalǵan is-sharalardy júzege asyrý jónindegi vedomstvoaralyq jumys toby quryldy» - dep málimdedi QR Ulttyq qaýipsizdik komıteti tóraǵasynyń orynbasary Nurǵalı Bilisbekov Senattyń Halyqaralyq qatynastar, qorǵanys jáne qaýipsizdik komıtetiniń otyrysynda.
Onyń aıtýynsha, qazir elimizge 63 bala oralǵan. Shamamen taǵy 50 bala elge qaıtarylady dep kútilýde. «Birden aıtaıyn, qazir Sırııa-Irak aýmaǵynda 16 jasqa deıingi 390 bala júr, onyń 214-i ul, 176-sy qyz bala. Bul az san emes, balalarmen ońaltý jumystaryn júrgizý boıynsha alda aýqymdy sharýalar kútip tur. Biz atalǵan derekterdi aıta otyryp onyń shyndyqqa qanshalyqty jaqyn ekendigine kepildik bere almaımyz. Balalardyń terrorıstik aýmaqtarda júrgeni anyq. Biraq sol balalardyń barlyǵy tiri me? Osyny dóp basyp aıta almaımyz»,- dedi Nurǵalı Bilisbekov.
«Bizde bombalanatyn aýmaqtarda qazaqstandyqtar da júr degen aqparat bar. Málimetti naqtylap tekserip jatyrmyz, biraq bul óte qıyn sharýa, ol jaqta eshqandaı konsýldyq joq, qaqtyǵys aýmaqtaryn jergilikti bılik qadaǵalamaıdy dese de bolady, biraq biz qoldan kelgenniń bárin jasaýǵa tyrysamyz»,- dep atap ótti ol.
