QR úkimetiniń jańa komandasy jasaqtalyp, jańa jumys kezeńi bastaldy
Memleket basshysy el Konstıtýtsııasyna sáıkes Májiliske Úkimet basshysy laýazymyna kandıdattyqqa Serik Nyǵmetuly Ahmetovti usyndy. QR Prezıdentiniń tańdaýyn halyq qalaýlylary biraýyzdan maquldady, óıtkeni S.Ahmetov atqarýshy bılikte de, bergilikti bılikte de jumys istep, ysylǵan maman bolatyn.
«Serik Ahmetovtiń iri jobalardy iske asyrý salasynda basqarýshylyq-ákimshilik jumysta zor tájirıbesi bar. Bul bizdiń ekonomıkany ártaraptandyrý jáne ındýstrııalandyrý, áleýmettik jańǵyrtý baǵytyn jalǵastyrý úshin erekshe mańyzdy. Ol Úkimettiń búgingi jumysyn biledi jáne qazir iske asyrylyp jatqan baǵdarlamalardy daıyndaýǵa atsalysty. Ol burynǵy qyzmetterde ózin jaqsy qyrynan kórsetti. Serik Ahmetovtiń kandıdatýrasy jańa Úkimettiń tıimdi jumysyn qamtamasyz etý úshin eń qolaıly dep sanaımyn. Qazaqstan Respýblıkasy Konstıtýtsııasynyń 56-babyna sáıkes Parlament Májilisinen Serik Ahmetovti Qazaqstan Respýblıkasynyń Premer-Mınıstri qyzmetine taǵaıyndaýǵa kelisim berýdi suraımyn», - dedi Qazaqstan Prezıdenti Parlament palatalarynyń birlesken otyrysynda.
Bul taǵaıyndaýdy halyq qalaýlylarymen qatar qazaqstandyq qoǵam da qup aldy. Sebebi, S.Ahmetov ár kezde de áleýmettik salaǵa zor kóńil bóldi. Máselen, ol Qaraǵandy oblysynyń ákimi bolyp turǵan kezeńde óńirde kóptegen áleýmettik nysandardyń boı kóterip, halyq ıgiligine aınalǵandyǵy barshaǵa málim. Budan bólek ol áleýmettik máselelerdi sheshýge jeke bıznestiń tartylýyna da zor yqpal etken-di. Bizdiń elimizde memlekettik-jeke áriptestiktiń qalyptasýy men damýynyń da bastaýynda dál osy S.Ahmetov turǵan bolatyn ári Qaraǵandy oblysynda Memlekettik-jeke áriptestiktiń óńirlik ortalyǵy qurylǵan edi. Sonyń arqasynda áleýmettik salaǵa, ınfraqurylymdarǵa, densaýlyq saqtaý, sport isine, áleýmettik jobalardy júzege asyrýǵa barynsha mol qarjy tartylyp, qarqyndy damı túsken-di. Sonymen qatar ol Údemeli ındýstrııalyq-ınnovatsııalyq damý memleketttik baǵdarlamasy bastalǵanda da basy-qasynda bolyp, jańa jobalardyń júzege asyrylýyna muryndyq bola beldi. Onyń qatysýymen myńdaǵan jumys oryndary bar birneshe kásiporyndar salyndy. Bul rette aıta keterligi, 2012 jyly Qaraǵandy oblysynyń Qazaqstandaǵy, sonymen qatar TMD keńistigindegi barynsha qarqyndy damýshy sýbekt bolyp tanylýda tosyn emes. S.Ahmetovtiń óńirdegi bul jumysyna Memleket basshysy N.Nazarbaev zor baǵasyn bergen bolatyn.
S.Ahmetov Kólik jáne kommýnıkatsııa mınıstri bolǵan kezde Qazaqstannyń Kólik strategııasyn júzege asyrý baǵytynda barynsha tyńǵylyqty is atqardy. Onyń basshylyǵymen 2008 jyly temir jol salasyn reformalaý baǵdarlamasy qabyldandy. «Astana-Şýche» avtobanynyń qurylysy aıaqtalyp, Qazaqstandaǵy eń birinshi jartylaı júk vagondarynyń qurylysy iske qosyldy. Al ulttyq avıapark jańa ushaqtarmen tolyqty. S.Ahmetov kezeńinde «Batys Eýropa-Batys Qytaı» halyqaralyq kólik dáliziniń qurylysy bastaldy.
Al Premer-Mınıstrdiń birinshi orynbasary qyzmetinde ol óńirlerdiń áleýmettik-ekonomıkalyq ahýalyna zor kóńil bóldi. Onyń basshylyǵymen monoqalalardy damytý baǵdarlamasy ázirlendi.
Endigi ýaqytta jańa Premer-Mınıstrdiń basshylyǵymen Úkimet buǵan deıin qabyldanǵan josparlar men baǵdarlamalardy odan ári jalǵastyrady dep kútilýde.
«Búgingi kúnnen bastap Úkimet músheleri úshin jumystyń jańa kezeńi bastalady. Bizderge Memleket basshysy tarapynan zor senim artyldy. Sonymen qatar, tek qana maǵan emes, barlyǵyńyzǵa da, óıtkeni Úkimettiń jańa komandasy jasaqtaldy. Jáne de bizder Memleket basshysynyń osy zor senimin aqtaýymyz qajet», - degen edi S.Ahmetov Úkimettiń alǵashqy otyrysynda Mınıstrler kabıneti múshelerine qarata.
Buǵan deıin Prezıdent keńesshisi laýazymyn atqaryp, óńirlerdiń áleýmettik jańǵyrýyna basshylyq jasap kelgen Qyrymbek Kósherbaev Premer-Mınıstrdiń orynbasary bolyp taǵaıyndaldy. Onyń eńbek jolynda atqarǵan eń joǵary laýazymdary mynalar: Densaýlyq saqtaý, bilim berý jáne sport mınıstri, Batys Qazaqstan jáne Mańǵystaý oblystarynyń ákimi.
Ekonomıkalyq damý jáne saýda mınıstri qyzmetine buǵan deıin «QazInvestBank» AQ Dırektorlar keńesiniń tóraǵasy bolyp jumys istegen Erbolat Dosaev taǵaıyndaldy. Ol kommertsııalyq bankterdi basshylyq qyzmetter atqaryp, ATF banki basqarmasynyń tóraǵasy bolǵan. Energetıka, ındýstrııa jáne saýda vıtse-mınıstri, qarjy vıtse-mınıstri, Qazaqstan damý banki Dırektorlar keńesiniń tóraǵasy, Tabıǵı monopolııalardy retteý agenttiginiń tóraǵasy, Qarjy mınıstri, Densaýlyq saqtaý mınıstri laýazymdaryn atqarǵan.
Ekonomıkalyq damý jáne saýda mınıstrliginiń jańa basshysyn ujymymen tanystyrǵan Úkimet basshysy S.Ahmetov onyń jumys tájirıbesiniń mol ekendigine erekshe toqtala kele: «Men mınıstrliktiń aldyna júktelgen mindetterdi tabysty júzege asyrý úshin barlyq kúsh-jigerińiz ben bilimińizdi salyp qyzmet etedi dep senemin. Onyń ústine eldiń makroekonomıkasymen, strategııalyq damý máselelerimen aınalysyp, bizdiń elimizdegi barlyq derlik damý baǵdarlamalaryna saraptama jasaıtyn Ekonomıkalyq damý jáne saýda mınıstrliginiń aldyna júktelgen mindetter de aýqymdy. Men siz basshylyq jasaıtyn mınıstrlik shyn máninde Qazaqstan Úkimetindegi ortalyq býynǵa aınalýy tıis dep oılaımyn», - dedi.
Al Eńbek jáne halyqty áleýmettik qorǵaý mınıstri bolyp Serik Ábdenov jumysqa kiristi. Jańa mınıstrdi ujymymen tanystyrǵan Premer-Mınıstrdiń atap ótýinshe, ol eń jolyn Ádilet mınıstrliginiń bas mamany bolyp bastap, memlekettik qyzmettiń barlyq satysynan ótken. Eńbek jáne halyqty áleýmettik qorǵaý mınıstrliginiń departament dırektory, vıtse-mınıstri bolǵan. Sonymen qatar sońǵy ýaqytta Shyǵys Qazaqstan oblysy ákiminiń birinshi orynbasary bolyp, óńirmen jumys isteýge mol tájirıbe jınaǵan.
Buǵan deıin Qazaqstannyń AQSh-taǵy Tótenshe jáne Ókiletti Elshisi bolǵan Erlan Ydyrysov Syrtqy ister mınıstri qyzmetine taǵaıyndaldy. Ony SІM ujymymen Memleket basshysy N.Nazarbaev tanystyrdy. «Erlan Ydyrysov Syrtqy ister mınıstrliginiń basshylyǵynda buryn jumys istedi, sondaı-aq kóp jyl Londonda jáne Vashıngtonda elshi boldy, osy ýaqytta mol tájirıbe jınady. Endi sol tájirıbesin halyq pen eldiń ıgiligi úshin paıdalaný qajet», - dep atap ótken Nursultan Nazarbaev syrtqy ekonomıkalyq máselelerdi sheshýge erekshe nazar aýdarý qajettigin basa aıtty. Sonymen qatar naqty ekonomıkalyq baılanysymyz, múddemiz bar elderdegi elshilikterdiń jumysyn kúsheıtý kerektigine basa nazar aýdartty.
2010 jyldan beri Qaraǵandy qalasynyń ákimi bolyp kelgen Baýyrjan Ábdishev Qorshaǵan ortany qorǵaý vıtse-mınıstri bolyp taǵaıyndaldy. Ol sondaı-aq Qarjy mınıstrliginiń Kedendik baqylaý komıteti tóraǵasynyń orynbasary, «Nur Otan» HDP Áleýmettik-ekonomıkalyq baǵdarlamalary monıtorıngileý departamentiniń dırektory bolǵan.
