QR Úkimetiniń keıbir quzyretteri Indýstrııa mınıstrliginie berildi

NUR-SULTAN. QazAqparat - 2021 jylǵy 24 qarashada Qazaqstan Respýblıkasynyń Prezıdenti Qasym-Jomart Toqaev «Qazaqstan Respýblıkasynyń keıbir zańnamalyq aktilerine memlekettik basqarý deńgeıleri arasyndaǵy ókilettikterdi qaıta bólý máseleleri boıynsha ózgerister men tolyqtyrýlar engizý týraly» Zańǵa qol qoıdy, dep habarlaıdy QazAqparat.

«Osy Zań aıasynda memlekettik retteýdi odan ári iske asyrý maqsatynda QR Úkimetiniń keıbir quzyretteri ortalyq memlekettik organdarǵa berildi,-delingen QR Indýstrııa jáne ınfraqurylymdyq damý mınıstrliginiń baspasóz málimetinde.

Onyń ishinde QR Indýstrııa jáne ınfraqurylymdyq damý mınıstrligine:

- tekserý júrgiziletin kólik ınfraqurylymy obektileriniń tizbesin;

- tekserý júrgizilmeıtin tulǵalar tizimin;

- kólik ınfraqurylymy obektilerine ákelýge tyıym salynǵan zattar men quraldardyń tizbesin bekitý berildi.

Kórsetilgen máseleler QR Úkimetiniń 2014 jylǵy 23 shildedegi № 817 Qaýlysymen reglamenttelgen. Alaıda Úkimettiń keıbir quzyretterin berýge baılanysty QR Indýstrııa jáne ınfraqurylymdyq damý mınıstrligi «Tekserý júrgiziletin kólik ınfraqurylymy obektileriniń, olarǵa qatysty qarap tekserý júrgizilmeıtin adamdardyń, kólik ınfraqurylymy obektilerine ákelýge tyıym salynǵan zattar men quraldardyń tizbesin bekitý týraly» buıryq jobasyn ázirledi.

Jańa quqyqtyq aktini qabyldaý kólik ınfraqurylymy obektilerinde tekserip qaraýdy júrgizý tártibine qandaı da bir talaptardy qatańdatýdy ne jańa talaptardy engizýdi kózdemeıdi.

Buıryq jobasynyń tolyq mátini 2022 jylǵy 8 aqpanǵa deıin kópshilik talqylaýy úshin «Ashyq NQA» portalynda ornalastyrylǵan.