QR Úkimetiniń delegatsııasy jumys saparymen Reseı Federatsııasyna bardy

MÁSKEÝ. QazAqparat - QR Premer-Mınıstriniń orynbasary Roman Sklıar bastaǵan Qazaqstan Respýblıkasy Úkimetiniń delegatsııasy Reseı Federatsııasyna jumys saparymen keldi, depı habarlaıdy QazAqparat primeminister.kz silteme jasap.

RF Úkimeti tóraǵasynyń orynbasary Marat Hýsnýllınmen kezdesý barysynda jol salý salasyndaǵy birlesken jobalardy iske asyrý, shekara arqyly ótkizý pýnktterin qaıta qurý máseleleri talqylandy.

Taraptar sondaı-aq Qazaqstan men Reseıdiń qurylys normalary men erejelerin birizdendirý týraly máselelerdi pysyqtaý týraly sheshim qabyldady, bul qurylystaǵy jobalyq sheshimderdiń ekonomıkalyq tıimdiligin arttyrýǵa múmkindik beredi.

Kezdesýge qatysýshylar ónerkásiptik, saýda-ekonomıkalyq, ınvestıtsııalyq salalarda tyǵyz jumys isteý maqsatynda qosymsha múmkindikter jasaý boıynsha birlesken sharalardy iske asyrý, ózara tıimdi ekonomıkalyq yntymaqtastyq qaǵıdattaryna ózara beıildilikti atap ótti.

Qazaqstan men Reseı arasyndaǵy úkimetaralyq dıalogtyń tıimdiligi men qajettiligi atap ótildi jáne ózara baılanystardyń joǵary qarqynyna qoldaý kórsetý negizinde ýaǵdalastyqqa qol jetkizildi.

Sapar aıasynda Roman Sklıar Reseı Mashına jasaýshylar odaǵy seziniń plenarlyq sessııasynda da sóz sóıledi. QR Premer-Mınıstriniń orynbasary baıandamasynda Qazaqstan-Reseı ónerkásiptik kooperatsııasynyń nyǵaıýy mashına jasaý salasynyń damýyna oń yqpal etetinine senim bildirdi.