QR Úkimetinde memlekettik satyp alýlar júıesiniń jańa tujyrymdamasy talqylandy
ASTANA. 5 aqpan. QazAqparat - Búgin Úkimet úıinde QR Premer-Mınıstri Serik Ahmetovtiń tóraǵalyǵymen memlekettik satyp alýlar júıesin odan ári jetildirý máseleleri jóninde otyrys ótti.
Úkimet basshysy saıtynda habarlanǵanyndaı, selektorlyq rejımde ótken otyrys barysynda qarjy mınıstri Bolat Jámishev satyp alý júıesin jaqsartý, úderisterdiń ashyqtyǵy men qoljetimdiligi jónindegi jańa turǵylar týraly baıandady.
Elektrondyq satyp alýlardyń ómirsheńdigin jáne úlken áleýetin atap óte otyryp, ol memlekettik satyp alýlar veb-portaly boıynsha aqparatty usyndy, Call-ortalyqqa júginýdegi baıqalǵan problemalar jáne sheshý joldaryna, satyp alý baǵalaryna monıtorıng, shart boıynsha mindettemelerdi qamtamasyz etý máselelerine toqtaldy.
Qazirgi júıeni jaqsartý boıynsha mınıstr memlekettik satyp alýdyń ortalyqtandyrylǵan organyn qurýdy usyndy. Onyń pikirinshe, mundaı organ quqyqtyq jáne tehnıkalyq biliksizdik máselesin, sondaı-aq memlekettik satyp alýdyń veb-portalyn paıdalanýmen baılanysty problemalardy sheshýi tıis.
«Júıeni ortalyqtandyrý satyp alý úderisteriniń ashyqtyǵyn qamtamasyz etip, sybaılas jemqorlyqqa jol bermeýge, baıqaýlardyń ótkizilmeı qalýyn joıýǵa, tapsyrys berýshi men satyp alýdy uıymdastyrýshy ortalyq arasyndaǵy ózara baqylaýdy kúsheıtýge kómektesedi», - dedi B.Jámishev. Sonymen qatar ol ortalyqtandyrylǵan satyp alý organdarynyń quzyreti men tapsyrys berýshiniń ókilettikterine toqtalyp ketti.
Otyrys qorytyndysyn shyǵara kele, Úkimet basshysy talqylanyp otyrǵan «memlekettik organdar, bıznes, ekonomıka salalaryn qamtıtyn» máseleniń mańyzyna nazar aýdardy. S.Ahmetov «elektrondyq satyp alýdyń balamasy joq, sondyqtan memlekettik satyp alýdyń jańa tujyrymdamasyn muqııat ázirlep, ilki joba retinde iske asyryp qaraý kerek» dep atap ótti.
