QR Úkimetinde eldegi eńbek qatynastaryn retteıtin 2015-2017 jyldarǵa arnalǵan bas kelisimge qol qoıyldy (FOTO)

ASTANA. QazAqparat - Búgin QR Úkimetinde áleýmettik áriptestik jáne áleýmettik eńbek qatynastaryn retteý jónindegi Respýblıkalyq úshjaqty komıssııanyń keńeıtilgen otyrysynda Úkimet, jumysshylar men jumys berýshilerdiń respýblıkalyq birlestikteri arasynda 2015-2017 jyldarǵa arnalǵan bas kelisimge qol qoıyldy.

Kelisimdi ázirleýge áleýmettik áriptester - Kásipodaqtar federatsııasy, Qazaqstannyń eńbek federatsııasy, Qazaqstannyń erkin kásipodaqtary federatsııasy, Ulttyq kásipkerler palatasy jáne jumys berýshilerdiń salalyq qaýymdastyqtary qatysty.

QR Premer-Mınıstriniń birinshi orynbasary Baqytjan Saǵyntaevtyń aıtýynsha, atalmysh kelisim jumys berýshilerdiń aldynda úlken mindetter júkteıdi. Ásirese, jumysshylardyń arasynda eńbek daýynyń týyndamaýyn, jumys oryndarynyń negizsiz qysqartylýyn jáne áleýmettik paketterdiń tolyqqandy berilýin qamtamasyz etetin bolady. "Aıta keteıin, qol qoıylǵan kelisim áleýmettik eńbek jáne soǵan baǵynyshty ekonomıkalyq qarym-qatynastardy retteýge baǵyttalǵan. Bul qujatta eńbek jáne áleýmettik salanyń bar qyrlary kórsetilgen. Kelisim jaqyn bolashaqqa belgilengen ekonomıkalyq-áleýmettik maqsattardy eskere otyryp jasaldy. Sonymen qatar "Kásipodaqtar týraly" jańa zańnyń erekshelikteri eskerildi", - dep atap ótti birinshi vıtse-premer qujatqa qol qoıý rásiminde.