QR Úkimeti janyndaǵy JǴTK otyrysynda 2014 jylǵa ǵylymı zertteýlerdi granttyq qarjylandyrý kólemi bekitildi
ASTANA. 22 shilde. QazAqparat - Búgin Úkimet úıinde QR Premer-Mınıstri Serik Ahmetovtiń tóraǵalyǵymen QR Úkimeti janyndaǵy Joǵarǵy ǵylymı-tehnıkalyq komıssııanyń otyrysy boldy, dep habarlady primeminister.kz.
Otyrysta 2014 jylǵa arnalǵan ǵylymı zertteýlerdi granttyq qarjylandyrý kólemi qaralyp, bekitildi. Bul másele boıynsha QR bilim jáne ǵylym mınıstri B.Jumaǵulov baıandama jasady.
S.Ahmetov Memleket basshysy ǵylymǵa, onyń ishinde bizdiń ǵalymdardy ınnovatsııalyq úderisterge, ekonomıkany damytýǵa tartý úshin jaǵdaılar jasaýǵa aıryqsha kóńil bóletinin atap ótti.
«Granttyq qarjylandyrý baıqaýynyń qorytyndysy kórsetkendeı, ulttyq ǵylymı keńester usynylǵan 6593 ótinimniń ishinen 2115 jobany tańdap aldy. Jobalardy irikteý barysynda táýelsiz sarapshylar qyzmeti engizilip, barlyǵy 2990 sarapshy tartyldy, onyń ishinde 1759 sheteldik sarapshylar», - dedi B.Jumaǵulov.
Mınıstrdiń aıtýynsha, ótinimder dınamıkasy ǵalymdardyń joǵarǵy belsendiligin kórsetip otyr, sonymen, endi jobalardy ǵylymı uıymdarmen qatar, jekelegen zertteýshiler de usyna alady.
«Bul oraıda, ótken jyldary Almaty men Astana qalalary tolyq basymdyq alǵan bolsa, búgingi kúni jobalardyń 40%-ǵa jýyǵy óńirlerdiń úlesine tıip otyr», - dep atap kórsetti B.Jumaǵulov.
Budan basqa, JǴTK músheleri 2014-2016 jyldarǵa arnalǵan baǵdarlamalyq-maqsatty qarjylandyrý, sondaı-aq ǵylymdy damytý basymdyqtary boıynsha jańa ǵylymı-tehnıkalyq baǵdarlamalardy maquldady.
