QR Úkimeti janyndaǵy Tehnologııalyq saıasat jónindegi keńestiń otyrysy ótti
Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın Dúnıejúzilik zııatkerlik menshik uıymynyń jyl saıynǵy jahandyq reıtıngin taldaý qorytyndysy boıynsha Qazaqstannyń ınnovatsııalyq ekojúıesiniń tıimdiligin arttyrý jóninde usynystar ázirlengenin baıandady.
ıAǵnı, ozyq elder men uıymdardyń tájirıbesine negizdelgen jańa tásil aıasynda kúsh-jigerdi jekelegen baǵyttarǵa, atap aıtqanda, azamattardyń densaýlyǵy men ómir súrý sapasyn jaqsartý maqsatynda densaýlyq saqtaý júıesin jetildirý úshin MedTech; ekologııalyq taza aýyl sharýashylyǵy ónimderin óndirýdi damytý úshin AgriTech; «jasyl» tehnologııalardy, energııany tıimdi paıdalaný men únemdeýdi damytý úshin GreenTech jańa tehnologııalaryn engizý baǵyttaryna shoǵyrlandyrý usynylyp otyr.
Bul tásil belgili bir sanaýly baǵyttaǵy ınnovatsııalardyń tıimdiligin arttyrýǵa múmkindik beredi jáne jalpy ekonomıkanyń damýyna oń mýltıplıkatıvti áser etedi.
Sonymen qatar otyrysta ekonomıkanyń túrli salalarynyń ınnovatsııalyq belsendiligin yntalandyratyn tehnologııalyq quzyretterdiń salalyq ortalyqtaryn qurý máseleleri qaraldy. Atap aıtqanda, mundaı ortalyqtardyń mindetterine qoldanystaǵy salalardyń tehnologııalyq damýyn taldaý, halyqaralyq trendter monıtorıngi, tıisti bilim men tájirıbeni jınaqtap-taratý kiredi.
Premer-Mınıstr osyndaı ortalyqtardy qurý jáne damytý boıynsha álemdik tájirıbeni taldaý qajettigin atap ótti.
«Quzyrettilik ortalyǵy salanyń barlyq kásiporyndary úshin jaqsy sheshim bolýy kerek. Bul álemdik trendter men jańa perspektıvalyq tehnologııalardy taldaý, sodan keıin ozyq tájirıbeni taratý degendi bildiredi. Atalǵan jumysqa «Atameken» ulttyq kásipkerler palatasy da óz úlesin qosýy tıis, damý úshin ne qajet ekenin bıznestiń ózderi aıtýy kerek», — dedi Álıhan Smaıylov.
Sonymen qatar otyrysta «Ónerkásipke arnalǵan ınnovatsııalar» biryńǵaı aqparat júıesin iske qosý máselesi qaraldy.
Bul jer qoınaýyn paıdalanýshylardyń ǵylymı-zertteý jáne tájirıbelik-konstrýktorlyq jumystardy qarjylandyrý jónindegi mindettemeleriniń oryndalýyna monıtorıng júrgizýge, sondaı-aq ónerkásip kásiporyndarynyń, ınvestorlardyń, JOO men ǴZI-dyń ózara is-qımylyn jolǵa qoıýǵa múmkindik beredi. Nátıjesinde munyń bári ınnovatsııalyq tehnologııalardy belsendi túrde óndiriske engizýge kómektesýi kerek.
Foto: primeminister.kz
