QR Úkimeti jaldamaly baspana boıynsha aı saıynǵy jumys josparyn bekitti
ASTANA. QazAqparat - QR Úkimetinde jalǵa beriletin baspana boıynsha aı saıynǵy jumys jospary bekitildi. Bul týraly búgin QR Parlamenti Senatynda QR Premer-mınıstriniń birinshi orynbasary Baqytjan Saǵyntaev aıtty.
«Biz jalǵa beriletin baspananyń aı saıynǵy josparyn bekittik. Sondyqtan selektorlyq otyrystardy jıi ótkizetin bolamyz. Bizdiń qoıyp otyrǵan talaptarymyz - baǵdarlama boıynsha qandaı kompanııa qandaı qalada qurylys bastalatynyn anyqtap alý qajet jáne olar birinshi jáne besinshi qabattardy salyp bolǵan soń páterlerdiń kiltin birden tapsyrady. Munyń barlyǵy josparda tolyq bekitilgen. Selektorlyq otyrystarda biz óńirlermen birlese otyryp, osy máselelerdi qadaǵalaıtyn bolamyz. Eń basty talap - halyq aldyndaǵy esep. Eger de qandaı da bir kemshilik shyqsa, barlyq jumysymyz esh ketedi», - dep túsindirdi B. Saǵyntaev depýtattardyń suraǵyna jaýap berý barysynda.
Onyń aıtýynsha, bıyl Qazaqstan boıynsha «Nurly jol» baǵdarlamasy aıasynda jaldamaly turǵyn úı salýǵa bólinetin bıýdjet qarajat molaıtyldy.
«2014 jyly respýblıkalyq bıýdjetten jaldamaly turǵyn úıge 35,9 mlrd. teńge bólingen bolatyn. Olar tolyq ıgerildi. Budan bólek, bıyl aıaqsyz qalǵan qurylystardy salyp bitirýge qosymsha 14 mlrd teńge qarastyrylyp otyr. 2015 jyly «Nurly jol» baǵdarlamasy aıasynda jaldamaly turǵyn úı salýǵa 92,5 mlrd teńge bólingen, olar tolyǵymen ıgeriledi. Bul baǵyttaǵy jumystar belsendi túrde júrgizilýde. Biz tek turǵyn úılerdi salyp qana qoımaı, salynǵan úılerdi de satyp alamyz. Bıyl Astana, Almaty jáne Qostanaı qalalarynda 2157 páter qoldanysqa beriledi. Shymkent pen Aqtóbede - 1222 páter beriledi. Eń alǵashqylardyń biri bolyp, Qyzylorda men Kókshetaýda shamamen sáýir aıynda páterler berile bastaıdy. Degenmen qurylys júrgizetin kompanııalarǵa degen qadaǵalaý óte kúshti bolady», - dep túıdi B. Saǵyntaev.
