QR Úkimeti tabıǵı monopolııalar salasyndaǵy tarıftik saıasat baǵdarlamasyn bekitti
ASTANA. QazAqparat - Búgin QR Premer-Mınıstri Kárim Másimov Úkimet otyrysyn ótkizdi. Onda eldiń áleýmettik-ekonomıkalyq damýyna qatysty máseleler qaraldy.
2020 jylǵa deıingi tabıǵı monopolııalar salasyndaǵy tarıftik saıasat baǵdarlamasy bekitildi jáne 2020 jylǵa deıin Qazaqstan Respýblıkasyndaǵy qyzmet salasyn damytý boıynsha baǵdarlama jobasy qaraldy, dep habarlady QR Premer-Mınıstriniń resmı portalynan. Sondaı-aq 2050 jylǵa deıin elordanyń álemdegi úzdik qalalardyń ondyǵyna enýi tujyrymdamasy maquldandy. Tarıftik saıasat baǵdarlamasymen tanystyrǵan ulttyq ekonomıka mınıstri E.Dosaev onyń basty maqsaty tabıǵı monopolııalar sýbektileriniń qyzmetin retteýdiń tıimdi júıesin qurý ekenin aıtty. Baǵdarlamada shyǵyndardy retteý ádisi, tabıǵı monopolııalar jáne retteletin naryqtar týraly zańnamany yryqtandyrý, tarıf qurýdyń yntalandyrýshy ádisterin paıdalaný qarastyrylǵan. «Bul baǵdarlamanyń júzege asyrylýy tarıftiń turaqtylyǵyn qamtamasyz etedi, jylýmen qamtý, sýmen qamtý jáne sýdy tartý salasyna qosymsha jeke ınvestıtsııalardy tartyp, tabıǵı monopolııalar salasynda eskirý men shyǵyndardy 2020 jylǵa qaraı josparlanǵan deńgeıge deıin azaıtady», - dedi E.Dosaev. Sondaı-aq otyrysta 2014 jyldyń 11 aıynda eldiń áleýmettik-ekonomıkalyq damý qorytyndysy, respýblıkalyq bıýdjettiń atqarylýy jáne áleýmettik-ekonomıkalyq saıasat sharalarynyń, Jol kartasynyń júzege asyrylý barysy talqylandy. Jıyndy qorytyndylaı kele, Úkimet basshysy tıisti memlekettik organdarǵa birqatar tapsyrmalar júktedi.
