QR Úkimeti Sý resýrstaryn basqarý jónindegi memlekettik baǵdarlamanyń jobasyn qabyldady
ASTANA. 24 jeltoqsan. QazAqparat - Búgin QR Úkimeti otyrysynda Sý resýrstaryn basqarý jónindegi memlekettik baǵdarlamanyń jobasy qabyldandy.
Atalǵan másele boıynsha sóz alǵan QR Qorshaǵan ortany qorǵaý jáne sý resýrstary mınıstri Nurlan Qapparovtyń aıtýynsha, bul joba QR Prezıdentiniń tapsyrmasy boıynsha elimizdiń 2050 jylǵa deıingi damý strategııasynyń Jalpy ulttyq josparyna sáıkes ázirlengen.
«Halyq sanynyń ósýi, klımattyq ózgerý men onyń saldarynan tabıǵı apattardyń kóbeıýi, sondaı-aq, ekologııalyq júıelerdiń degradatsııasy jaǵdaıynda sý qaýipsizdigin qamtamasyz etý máseleleri basym baǵyt bolýy kerek. Aldaǵy ýaqytta elderdiń ekonomıkalyq damýy sý resýrstaryna tikeleı baılanysty bolmaq»,- dedi ol.
Onyń aıtýynsha, baǵdarlama jobasy barlyq memlekettik organdarmen, oblystardyń, Astana jáne Almaty qalalarynyń ákimshiliktermen kelisilgen. Talap etilgen barlyq saraptamadan ótken. Respýblıkalyq bıýdjettik komıssııa baǵdarlamanyń 8,2 trln. teńge quraıtyn jalpy bıýdjetin qoldaǵan.
