QR Úkimeti otyrysynda sý tasqyny jaǵdaıy máseleleri qaraldy
ASTANA. QazAqparat - Búgin Úkimet Úıinde QR Premer-Mınıstri Kárim Másimovtiń tóraǵalyǵymen QR Úkimetiniń selektorlyq rejimdegi otyrysy ótti, onyń barysynda sý tasqyny, sý basýdyń aldyn alý boıynsha qoldanylyp jatqan sharalar, sondaı-aq kóktemgi-egis jumystaryna daıyndyq máseleleri qaraldy, dep habarlady www.primeminister.kz.
Іshki ister mınıstri Qalmuhanbet Qasymovtyń málimetinshe, aǵymdaǵy sý tasqyny jaǵdaıy eldiń tórt óńirindegi 43 eldi mekenniń tirshilik áreketin qıyndatty, 535 turǵyn úıdi sý basyp, uzyndyǵy 20 shaqyrym bolatyn avtomobıl joldarynyń 190 ýchaskesin sý shaıǵan, 2 kópir qıraǵan.
Mınıstrdiń málimetinshe, apatty joıý maqsatynda apattyq-qutqarý jumystaryna tórt myńnan astam adam, 1140 tehnıka birligi, 259 sý sorǵysh qurylǵy jumyldyrylyp, 36 shaqyrym ýaqytsha bóget salyndy. Qoldanylǵan sharalardyń arqasynda 471 úı qurǵatylyp, 500-den astam adam turǵylyqty oryndaryna oraldy.
Qazirgi sátte vedomstvonyń aldynda apat saldaryn joıý, sý basqan aımaqtarda qutqarý jumystaryn júrgizý, ózenderdiń deńgeıin úzdiksiz qadaǵalaýdy uıymdastyrý, qajetti tehnıkany daıyndaý jáne gıdrotehnıkalyq qurylymdardyń jaǵdaıyn turaqty baqylaý boıynsha mindetter tur.
Kóktemgi-egis jumystaryna daıyndyq barysy týraly aýyl sharýashylyǵy vıtse-mınıstri Erlan Nysanbaev málimdedi. Aldyn ala málimetter boıynsha, 2016 jyly aýyl sharýashylyǵy daqyldaryn egýge arnalǵan alqapty 21,6 mln gektarǵa deıin arttyrý josparlanǵan, bul 2015 jylmen salystyrǵanda 400 myń gektarǵa artyq. Astyq daqyldaryn 15,2 mln gektarǵa egý kózdelgen.
Energetıka mınıstri Qanat Bozymbaev aýyl sharýashylyǵy ónimderin óndirýshilerge arnalǵan munaı ónimderiniń kólemi jaıly málimetti tanystyrdy. Onyń aıtýynsha, dızel otynynyń qory aýyl sharýashylyǵy taýarlaryn óndirýshilerdiń qajettiligin tolyq qamtıdy, onyń kólemi 366,8 myń tonnany qurady.
Otyrys qorytyndysy boıynsha K.Másimov Úkimet múshelerine sý tasqyny jaǵdaıyn turaqty baqylap, sondaı-aq egis jumystaryn úzdiksiz júrgizýdi qamtamasyz etýdi tapsyrdy.
