QR Úkimeti óńirlerdegi jastardyń qyzmetine 20 mln. dollar óteýsiz grant berýdi josparlaýda
QR BǴM baspasóz qyzmetiniń habarlaýynsha, grant týraly Kelisim jastardy yntalandyrýǵa, ásirese tabysy az, jumyssyz, múgedek jandar jáne osal toptardan shyqqan jastardy áleýmettik jobalardy iske asyrýǵa jáne tabys tabýǵa múmkindik berý maqsatyn kózdeıdi.
Kelisim aıasynda 18-29 jas aralyǵyndaǵy jastarǵa usynylatyn qoǵamdyq paıdaly qyzmetti iske asyratyn jobalar qarjylandyrylady dep boljanýda.
«Bul jastardyń bos ýaqytyn durys uıymdastyrýǵa, múgedek jandarǵa kómek kórsetýge, bilim berýge jáne úıretýge, jastarǵa keńes berýge, jergilikti jerdi abattandyrýǵa, janýarlardy qorǵaýǵa jáne t.b. jumystarǵa arnalǵan jobalar bolýy múmkin.
Jalpy, grant boıynsha 8,5 myń jastardy qamtıtyn 1 700-den astam jobany qarjylandyrý (jastardyń basym bóligi otbasy az qamtylǵan, jumyssyz jáne basqa jastardyń osal toptary), sonymen qatar 100 jastar uıymyn qamtý josparlanýda.
Osy jobany iske asyrý úshin pılottyq óńirler retinde Almaty, Qaraǵandy, Pavlodar jáne Ońtústik Qazaqstan oblystary aıqyndaldy.
Ár jobaǵa 4 myń AQSh dollary bólinedi, ol 6 aı boıy iske asyrylady. Budan basqa, jobalarǵa qatysýshylar aı saıyn áleýmettik stıpendııaalady (140-tan 325 AQSh doll. deıin).
Jobaǵa qatysýǵa nıet bildirgen jastardyń (5 adamǵa deıin) toptary óz jobalarymen ákimdiktiń janynda jumys jasaıtyn Jastardyń resýrstyq ortalyqtaryna barady. Usynylǵan jobalardy QR BǴM-i qurǵan qoǵamdyq qaıratkerlerden, úkimettik emes uıymdardyń jáne memlekettik organdardyń ókilderinen turatyn arnaıy Komıssııa irikteıdi. Jastar konkýrsqa yntaly toptardyń quramynda jáne jastar (qabyldaýshy) uıymdary arqyly qatysa alady.
Kelisim ratıfıkatsııalanǵannan keıin, barlyq uıymdastyrý jumystardy júzege asyratyn Úılestirý agenttigin tartý úshin halyqaralyq konkýrs jarııalanady. Jobany iske asyrý merzimi 2016-2017 jyldar», - dep jazylǵan habarlamada.
Buǵan deıin habarlaǵandaı, 28 qańtar kúni Senattyń jalpy otyrysynda palata depýtattary «Qazaqstan Respýblıkasy men energııa tıimdiligin arttyrý baǵdarlamalaryna jáne jastar korpýsyn damytýǵa arnalǵan bir donordyń Trast qory ákimshisi retinde áreket etýshi Halyqaralyq qaıta qurý jáne damý banki arasyndaǵy grant týraly (Jastar korpýsyn damytý jobasy) kelisimdi ratıfıkatsııalaý týraly» QR Zańyn qabyldaǵan bolatyn.
«Kelisimniń birneshe maqsattary bar. Birinshiden, jastardy ásirese, jumyssyz, tabysy az, múgedek, osal toptarǵa jatatyn sanattaǵy jastardy qoǵam ómirine tartý bolyp tabylady. Ekinshiden, qoǵamdyq paıdaly qyzmet daǵdylaryna oqytý baǵdarlamalary arqyly olardyń ómirlik mańyzdy daǵdylaryn damytý kózdeledi. Osyǵan baılanysty Dúnıejúzilik bank Jastar korpýsyn damytý jobasyn qarjylandyrýǵa járdem kórsetý úshin Qazaqstanǵa osy kelisimde jazylǵan nemese aıtylǵan tártippen 21,7 mln. dollar mólsherinde grant bóledi. Grant Trast qorynyń qarajatynan qarjylandyrylady, ony tolyqtyrý úshin Dúnıejúzilik Trast qorynyń donorynan kezeńder boıynsha jarnalar alynyp otyrady» -, dedi zań jobasyn tanystyrǵan Bilim jáne ǵylym mınıstri Aslan Sárinjipov.
