QR Úkimeti munaıdyń barreline 20 dollar baǵamy kezinde ekonomıkany damytýdyń stsenarııin ázirledi
ASTANA. QazAqparat - QR Úkimeti munaıdyń barreline 20 dollar baǵamy kezinde ekonomıkany damytýdyń stsenarııin ázirledi. Bul týraly búgin QR Qarjy mınıstri Baqyt Sultanov málim etti.
«Úkimet barlyq máseleni nazarda ustap otyr. Munaı baǵamy barreline 30 dollar, 20 dollar jáne odan tómen bolǵan jaǵdaıda stsenarıılerdi júzege asyrýdy qarastyrý kezeńindemiz. Sondyqtan bizde qarjylandyrý boıynsha eshqandaı qaýip joq»,-dedi B. Sultanov Ortalyq kommýnıkatsııalar qyzmetindegi baspasóz máslıhatynda.
Onyń sózine qaraǵanda, búginde bıýdjettiń shyǵys bóligi aıtarlyqtaı ońtaılandyryldy jáne bul óz kezeginde ekonomıkanyń damýyna múmkindik beredi.
«Shyǵystardyń negizgi bóligi - áleýmettik tólemder. 2015 jylǵa qaraǵanda 2016 jyly onyń úlesi 39 paıyzdan 40 paıyzǵa deıin ósti. Árıne, memlekettik apparatqa qatysty bólikti ońtaılandyrý boıynsha belgili bir rezervter bar, alaıda eshqandaı da áleýmettik mindettemeler qysqartýǵa jatpaıdy»,-dedi vedomstvo basshysy.
Munymen qosa ol búginde álemdik úderisterdiń elimizdiń ekonomıkasyna yqpalyn tyńǵylyqty zerdeleý kerektigin sóz etti.
«Biz aldaǵy aptada ekonomıkalyq saıasat jónindegi keńestiń otyrysynda talqylaýlar ótkizemiz. Bul turǵyda stsenarııdi qashan, qaı merzimdi júzege asyrýdyń naqty sheshimi ázirlenedi»,-dedi B. Sultanov.
Mınıstr Úkimettiń shyǵystaryn qarjylandyrý baǵytynda búginde eshqandaı da problemalar joq ekenin qadap aıtty.
«1 mlrd. dollar kólemindegi qarjy 2016 jyldyń birinshi jartyjyldyǵynda ıgeriledi. Bizde qaryzǵa alý aıasynda zeınetaqy qorynyń resýrstary bar, kepildendirilgen transfertter men aǵymdaǵy túsimder qamtylǵan. Sondyqtan da qańtarǵa 700 mlrd. teńgege tarta jospar turǵysynda osy shyǵystardyń jartysyn esh problemasyz qarjylandyrdyq»,-dep túıdi mınıstr.
