QR Úkimeti men tıisti memlekettik organdarǵa Sybaılas jemqorlyqqa qarsy is-qımyldyń 2011-2015 jyldarǵa arnalǵan jańa salalyq baǵdarlamasyn iske asyrý jóninde tıisti sharalar qoldanýǵa usynym jasaldy
ANA. 18 mamyr. QazAqparat - Seısenbi kúni Aqordada Qazaqstan Respýblıkasynyń Memlekettik hatshysy Qanat Saýdabaevtyń tóraǵalyǵymen Qazaqstan Respýblıkasynyń Prezıdenti janyndaǵy Sybaılas jemqorlyqqa qarsy kúres máseleleri jónindegi komıssııanyń otyrysy bolyp ótti,
dep habarlaıdy QR Prezıdentiniń baspasóz qyzmeti.
Otyrysta Sybaılas jemqorlyqqa qarsy kúrestiń 2006-2010 jyldarǵa arnalǵan memlekettik Baǵdarlamasyn jáne Prezıdenttiń sybaılas jemqorlyqqa qarsy kúresti kúsheıtý jónindegi tapsyrmalaryn iske asyrý jónindegi 2010 jylǵa arnalǵan Іs-sharalar josparyn oryndaý qorytyndysy, sondaı-aq memlekettik organdardaǵy sybaılas jemqorlyq deńgeıiniń 2010 jylǵy reıtıngteri qaraldy.
Komıssııa otyrysyn asha otyryp Q. Saýdabaev: «Aǵymdaǵy jyl - Táýelsizdigimizdiń 20 jyldyǵynyń jyly Qazaqstan úshin azamattardyń quqyqtary men bostandyqtaryn qorǵaý, sondaı-aq jemqorlyqpen kúresti odan ári kúsheıtýdegi erekshe jaýapkershilik jyly bolyp sanalady. Osyǵan baılanysty Prezıdenttiń Qazaqstan halqyna Joldaýynda berilgen tapsyrmalardyń tabysty oryndalýy memlekettik organdar men jalpy qoǵamnyń aldaǵy ýaqyttaǵy jemqorlyqqa qarsy ymyrasyz kúresine tikeleı baılanysty bolmaq», - dep atap kórsetti.
Ekonomıkalyq qylmys jáne sybaılas jemqorlyqpen kúres agenttiginiń tóraǵasy Q.Qojamjarov, Bas prokýror A.Daýylbaev, Ulttyq Qaýipsizdik Komıtetiniń tóraǵasy N.Ábiqaev, Memlekettik qyzmet isteri agenttiginiń tóraǵasy Q.Nurpeıisov, Іshki ister mınıstri Q. Qasymov, Ádilet mınıstri R.Túsipbekov, Qarjy mınıstri B.Jámishev habarlamalar jasady.
Otyrys qorytyndysy boıynsha, Komıssııa tarapynan Úkimetke jáne tıisti memlekettik organdarǵa Sybaılas jemqorlyqqa qarsy is-qımyldyń 2011-2015 jyldarǵa arnalǵan jańa salalyq baǵdarlamasyn iske asyrý jáne Memleket basshysynyń sybaılas jemqorlyqqa qarsy kúresti kúsheıtý jónindegi tapsyrmalaryn oryndaý jóninde tıisti sharalar qoldanýǵa usynym jasaldy. Sondaı-aq, memlekettik organdardaǵy 2010 jylǵy sybaılas jemqorlyq deńgeıi reıtıngteri kórsetkishiniń nátıjeleri maquldandy.
