QR Úkimeti Indýstrııa 4.0 elementterin engizýdiń qadamdyq josparyn daıarlaıdy

ASTANA. QazAqparat -  Úkimet bıyldyń sońyna qaraı tórtinshi ónerkásiptik revolıýtsııa elementterin engizý boıynsha josparyn daıarlaıdy. Bul týraly búgin Úkimettegi baspasóz máslıhatynda Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.

«Bıyl qyrkúıek aıynda halyqaralyq sarapshylarmen birge ónerkásipterdiń Indýstrııa 4.0 tehnologııasyna ótýge daıyndyǵynyń tehnıkalyq taldaýyn aıaqtaımyz. Al, jyl sońyna qaraı 2025 jylǵa deıingi Indýstrııa 4.0 elementterin engizýdiń  qadamdyq jospary boıynsha Úkimet qaýlysyn qabyldaý kútilýde»,-dedi Jeńis Qasymbek.

Osy oraıda mınıstr elimizde bul protsesten qalmaýdyń múmkindigi bar ekenin aıta kele, «mundaǵy máseleniń barlyq qıyndyqtaryna qaramastan, biz Indýstrııa 4.0 tehnologııasy Qazaqstan úshin jańa múmkindikter ákeletinin kórip otyrmyz. Sonyń ishinde tıimdilikti arttyrý, jańa bıznes pen eksportqa baǵyttalǵan óndiris qurý máselelerin aıtýǵa bolady»,-dedi.

Jeńis Qasymbektiń aıtýynsha, Indýstrııa 4.0 tehnologııasyna kóshý protsesi álem boıynsha áli bastapqy kezeńde keledi. Damyǵan jáne tez damýshy elderdiń basym kópshiligi ózderiniń ulttyq tsıfrly transformatsııa strategııalaryn tek sońǵy 4-5 jylda ǵana iske asyrýǵa kiristi.  Máselen, Germanııa 2011 jyly, AQSh - 2012, Japonııa, Qytaı, Eýroodaqtyń basqa da elderi - 2014-2015 jyldary qabyldady.

Halyqaralyq sarapshylardyń málimetinshe, Indýstrııa 4.0 aıasynda  oryn alýy múmkin ózgerister jaıynda ázirge tolyq túsinik joq. Ónerkásipterdiń jańa standartqa túbegeıli kóshýi aldaǵy 10-15 jylǵa boljanyp otyr.