QR Úkimeti elimizge sheteldik ınvestıtsııa tartý boıynsha saıasatty barynsha qoldaıdy - Á. Isekeshev
ASTANA. 6 aqpan. QazAqparat - Qazaqstan Úkimeti elimizge sheteldik ınvestıtsııa tartý boıynsha saıasatty barynsha qolaıdy jáne kedergilerdi joıý boıynsha jumystardy jalǵastyrady. Bul týraly búgin Astanadaǵy brıfıngte QR Premer-Mınıstriniń orynbasary - Indýstrııa jáne jańa tehnologııalar mınıstri Áset Isekeshev aıtty.
«Sońǵy eki jylda Qazaqstannyń Ekonomıkalyq yntymaqtastyq jáne damý uıymymen (EYDU) birlese aıtarlyqtaı úlken joba júrgizilip, qazirgi kezde ol aıaqtaldy. Qazaqstan atalǵan uıymǵa kirý boıynsha belsendi jumys atqarýda»,-dedi ol.
EYDU damyǵan elderdiń klýby ekenin eskerip ótken mınıstr, sondyqtan Qazaqstannyń ınvestıtsııalyq komıtetke enýi kóptegen ınvestorlarǵa jol ashatynyn, elimizdegi ınvestıtsııalyq klımat standarttary óte joǵary ekenin atap ótti.
Atap aıtqanda, búgin Astanada Ekonomıkalyq yntymaqtastyq jáne damý uıymy Qazaqstan Respýblıkasynyń Úkimetine zertteýler nátıjelerin jáne olardyń negizinde túzilgen ınvestıtsııalyq zańnamany jetildirý jáne ınvestıtsııalyq saıasatty úndestirý boıynsha usynystarynyń tanystyrylymyn ótkizdi. EYDU agroónerkásiptik keshende qarjylandyrý júıesin jaqsartý; aqparattyq tehnologııalar (AT) salasynda kásipkerlikti damytý; ınvestıtsııalar tartýdyń salalyq strategııalaryn júzege asyrý esebinen ekonomıkanyń ken óndirýden basqa barlyq salalaryna ınvestıtsııalar tartý boıynsha usynystar daıyndady.
Vıtse-premer atap ótkendeı, EYDU zertteýleri Qazaqstanǵa keletin tikeleı sheteldik ınvestıtsııa kólemderin budan ári arttyrý úshin jáne, tutastaı alǵanda, ınvestıtsııalyq klımatty jetildirý úshin óte qundy.
Taratylǵan málimetterge qaraǵanda, shıkizattyq emes sektorǵa ınvestıtsııalar tartý máselesinde EYDU taldaýshylary 12 usynysty tanystyrdy. Olardyń 5 boıynsha Qazaqstan Úkimeti jumystar júrgizip jatyr. Atap aıtqanda, bular mynadaı baǵyttar: Memlekettik-jekemenshik seriktestigi tetigi arqyly ınvestorlardyń ınfraqurylymdyq jobalarǵa qatysýyn keńeıtý; zııatkerlik menshikti qorǵaýdy budan da tıimdirek retteý; bıznesti jaýapkershilikpen júrgizý tájirıbesin engizý (qyzmettiń ekologııalyq jáne basqa qarjylyq emes kórsetkishteri boıynsha aqparatty ashyp kórsetý talaptarynyń taralýy); bızneske ákimshilik jáne korrýptsııalyq júktemeni tómendetý (lıtsenzııalar alý, sheteldik jumysshylardy jumysqa ornalastyrý tártibin qarapaıymdandyrý); saýda saıasatyn lıberalızatsııalaý (saýda operatsııalaryn oryndaý úshin qajet qujattar tizimin qysqartý, kedendik málimetterdi óńdeý júıesin avtomattandyrý, jemqorlyqpen kúresti kúsheıtý).
Qalǵan 7 usynys boıynsha tereńirek zerdeleý jáne múddeli mınıstrliktermen jáne vedomstvolarmen qosymsha pysyqtaý talap etiledi. Bular: QR ulttyq múddelerin (ulttyq qaýipsizdigin) saqtaýdy eskere otyryp, sheteldik ınvestorlardyń aýyl sharýashylyǵy maqsattaryndaǵy jer resýrstaryna qoljetimdiligin keńeıtý; ekonomıkanyń jekelegen sektorlarynda (telekommýnıkatsııalar, BAQ, bank sektory, kólik) sheteldik ınvestorlar úshin kedergilerdi azaıtý; óńdeý sektoryndaǵy ınvestorlar úshin zańnama turaqtylyǵy normasyn engizý; jergilikti qamtýǵa qoıylatyn talaptardyń ońtaılylyǵyn jáne shynaıylyǵyn qamtamasyz etý; halyqaralyq arbıtrajdarmen ózara árekettestik tájirıbesin jaqsartý; ınvestıtsııalar úshin salyqtyq jáne kedendik rejımderdi jaqsartý; memlekettik kásiporyndarda jáne memlekettik qatysý bar kásiporyndarda korporatıvtik basqarýdyń naryqtyq qaǵıdalaryna jaqyndaý.
