QR Úkimeti bilim alýshylardy bilim berý uıymdarynyń úlgileri boıynsha aýystyrý jáne qaıta qabyldaý erejelerin bekitti

Bilim alýshylardy bilim berý uıymdarynyń úlgileri boıynsha aýystyrý jáne qaıta qabyldaý qaǵıdalaryn bekitý týraly

Qazaqstan Respýblıkasy Úkimetiniń qaýlysy № 110

 2012 jylǵy 19 qańtar,  Astana, Úkimet Úıi

«Bilim týraly» Qazaqstan Respýblıkasynyń 2007 jylǵy 27 shildedegi Zańynyń 4-babynyń 26) tar­maqshasyna sáıkes Qazaqstan Respýblıkasynyń Úkimeti qaýly etedi:
1. Qosa berilip otyrǵan Bilim alýshylardy bilim berý uıymdarynyń úlgileri boıynsha aýystyrý jáne qaıta qabyldaý qaǵıdalary bekitilsin.
2. Osy qaýly alǵashqy resmı jarııalanǵan kúninen bastap kúntizbelik on kún ótken soń qoldanysqa engiziledi.
Qazaqstan Respýblıkasynyń Premer-Mınıstri K.MÁSІMOV.

Qazaqstan Respýblıkasy Úkimetiniń 2012 jylǵy 19 qańtardaǵy №110 qaýlysymen bekitilgen

Bilim alýshylardy bilim berý uıymdarynyń úlgileri
boıynsha aýystyrý jáne qaıta qabyldaý qaǵıdalary

1. Jalpy erejeler
1. Bilim alýshylardy bilim berý uıymdarynyń úlgileri boıynsha aýystyrý jáne qaıta qabyldaý qaǵıdalary (budan ári - Qaǵıdalar) «Bilim týraly» Qazaqstan Respýblıkasy Zańynyń 4-babynyń 26) tarmaqshasyna sáıkes ázirlengen.
2. Qaǵıdalardyń menshik nysanyna jáne vedomstvolyq baǵynystylyǵyna qaramastan bilim alýshylardy bilim berý uıymdaryna aýystyrýdyń jáne qaıta qabyldaýdyń tártibin aıqyndaıdy.
3. Bilim alýshylardy kýrstan kýrsqa, bir bilim berý uıymynan ekinshisine, bir oqý nysanynan ekinshi nysanǵa, bir tildik bólimnen ekinshi tildik bólimge, bir mamandyqtan ekinshi mamandyqqa aýys­tyrý júzege asyrylady.
Stýdentterdi quqyq qorǵaý jáne arnaıy organdarǵa vedomstvolyq baǵynysty joǵary oqý oryndaryna aýystyrý kórsetilgen ýákiletti organdardyń basshylary bekitetin erejelermen retteledi.
4. Kúndizgi jáne keshki oqý nysanynda bilim alýshylardyń aýystyrý jáne qaıta qabyldaý týraly ótinishterin bilim berý uıymynyń basshysy jazǵy jáne qysqy demalys kezeńinde kezekti akademııalyq kezeń bastalǵanǵa deıin bes jumys kúni ishinde qarastyrady.
Syrttaı oqý nysanynda bilim alýshylardyń aýystyrý jáne qaıta qabyldaý týraly ótinishterin bilim berý uıymynyń basshysy qabyldaýshy bilim berý uıymynyń kezekti emtıhan sessııasy bastalǵanǵa deıin bir aı buryn qarastyrady.
5. Bilim alýshylardy aýystyrý jáne qaıta qabyldaý kezinde oqýdyń aldyńǵy akademııalyq kezeńinde oqyǵan jumys oqý josparyndaǵy pánderdiń akademııalyq aıyrmashylyǵy anyqtalady.
6. Jumys oqý josparynyń pánderindegi akademııalyq aıyrmashylyqty bilim berý uıymynyń basshysy oqý kartochkasynyń nemese transkrıpttiń kóshirmelerinde nemese oqýyn aıaqtamaǵan tulǵalarǵa beriletin anyqtamada (budan ári - Anyqtama) kórsetilgen oqyǵan pánderiniń tizbesi, akademııalyq saǵattardyń nemese kredıtterdiń baǵdarlamalary men olardyń kólemi negizinde anyqtaıdy.
7. Bilim alýshyny sheteldik bilim berý uıymynan aýystyrý jáne qaıta qabyldaý kezinde meńgerilgen oqý baǵdarlamalary (akademııalyq anyqtama, transkrıpt jáne t.b.) týraly qujat, sondaı-aq belgilengen tártippen Qazaqstan Respýblıkasynda nostrıfıkatsııalaý rásiminen ótýi tıis bilim berýdiń aldyńǵy deńgeıin aıaqtaǵany týraly qujat usynylady.
8. Jumys oqý jospary pánderindegi akademııalyq aıyrmashylyqtardy joıý úshin bilim alýshylar akademııalyq kezeń ishinde barlyq oqý sabaqtarynyń barlyq túrine qatysady, aǵymdaǵy baqylaýdyń barlyq túrin tapsyrady, qorytyndy baqylaýǵa jiberilgendigi týraly ruqsat alady.
9. Belgilengen merzimde joıylmaǵan jumys oqý jospary pánderindegi akademııalyq aıyrmashylyq keıinnen akademııalyq bereshek retinde eskeriledi.

2. Bilim alýshylardy bilim berý uıymdarynyń úlgileri
boıynsha aýystyrý jáne qaıta qabyldaý tártibi

Tehnıkalyq jáne kásiptik, orta bilimnen keıingi bilimniń bilim berý baǵdarlamalaryn iske asyratyn bilim berý uıymdaryndaǵy bilim alýshylardy aýystyrý jáne qaıta qabyldaý
10. Tehnıkalyq jáne kásiptik, orta bilimnen keıingi bilimniń bilim berý baǵdarlamalaryn iske asyratyn bilim berý uıymdarynda (budan ári - bilim berý uıymdary) bir mamandyqtan ekinshi mamandyqqa nemese oqýdyń bir nysanynan ekinshisine aýysý bilim berý uıymy basshysynyń buıryǵymen júrgiziledi.
11. Eger bilim alýshy bilim berý uıymymen bilim berý qyzmetterin kórsetý týraly jeke shart (budan ári - shart) jasassa, onda onyń basqa bilim berý uıymyna nemese bir mamandyqtan ekinshisine aýysýy úshin atalǵan sharttyń ózgertilýi nemese buzylýy qajet.
12. Birinshi kýrstyń bilim alýshysyn aýystyrýǵa birinshi semestrdi aıaqtaǵannan keıin uqsas mamandyqtar boıynsha ruqsat etiledi.
13. Basqa bilim berý uıymyna aýysýǵa nıet bildirgen bilim alýshy bilim alyp jatqan bilim berý uıymy basshysynyń atyna erkin nysanda aýysý týraly jazbasha ótinish beredi jáne aýysýǵa mórmen bekitilgen jazbasha kelisim alyp, ózi qalaǵan bilim berý uıymynyń basshysyna ótinish bildiredi.
Qabyldaýshy bilim berý uıymy basshysynyń atyna jazylǵan aýysý týraly ótinishke aýystyratyn bilim berý uıymy basshysynyń qolymen kýálandyrylǵan bilim alýshynyń synaq kitapshasynyń (nemese úlgerim kitapshasynyń) kóshirmesi qosa tirkelýi qajet.
14. Aýystyrý týraly másele sheshilgen jaǵdaıda bilim alýshyny qabyldaıtyn bilim berý uıymynyń basshysy onyń oqý sabaqtaryna ruqsat berý, oqý josparyndaǵy aıyrmashylyqtardy tapsyrý týraly buıryq shyǵarady, buryn bilim alýshy oqyǵan bilim berý uıymyna onyń jeke is qujattaryn jiberý týraly jazbasha suraý joldaıdy.
15. Bilim berý uıymdarynyń bilim alýshylary qataryna qabyldaý týraly buıryq bilim alýshynyń buryn oqyǵan bilim berý uıymynan jeke is qaǵazdary alynǵannan keıin shyǵarylady.
16. Bilim berý uıymdarynda buryn bilim alǵan tulǵalar sol nemese basqa bilim berý uıymyna qaıta qabyldana alady.
Qaıta qabyldaýdyń mindetti sharty bilim alýshynyń bir semestrdi aıaqtaýy bolyp tabylady jáne qaıta qabyldaý týraly másele onyń jeke ótinishi negizinde ǵana qaralady.
Bilim alýshylardy birinshi kýrsqa qaıta qabyldaýǵa birinshi semestrdi aıaqtaǵannan keıin tıisti nemese uqsas mamandyqtar boıynsha ruqsat etiledi.
17. Oqý aqysyn tólemegeni úshin semestr kezinde oqýdan shyǵarylǵan aqyly negizde oqıtyn bilim alýshy tólemaqy boıynsha qaryzyn ótegen jaǵdaıda oqýdan shyǵarylǵan sátten bastap tórt aptanyń ishinde oqýǵa qaıta qabyldanýǵa quqyly, bul rette bilim berý uıymy tólemaqy boıynsha qaryzyn ótegeni týraly qujatty usynǵan jaǵdaıda úsh jumys kúni ishinde bilim alýshyny qaıta qabyldaıdy.
18. Buryn basqa bilim berý uıymdarynda bilim alǵan bilim alýshylardy oqýǵa qaıta qabyldaýǵa: kýrstar men mamandyqtar boıynsha oqytýdyń tıisti oqý toptary bolǵan jaǵdaıda; oqýdy aıaqtamaǵan tulǵalarǵa beriletin Anyqtamada (nemese bilim alýshynyń synaq kitapshasynda) kórsetilgen oqý pánderiniń qabyldaýshy bilim berý uıymynyń jumys oqý josparynyń oqý pánderi tizbesinen aıyrmashylyǵy tórt oqý pánderinen artyq bolmaǵan jaǵdaılarda ruqsat etiledi.
19. Jumys oqý josparynyń pánderi men oqý saǵattaryndaǵy aıyrmashylyqty bilim berý uıymy basshysynyń oqý isi jónindegi orynbasary belgileıdi. Oqý jospary pánderindegi aıyrmashylyqty joıýdyń tártibi men merzimi bilim berý uıymy basshysynyń buıryǵymen bekitiledi.
20. Buryn bilim alǵan bilim alýshy basqa bilim berý uıymyna oqýǵa qaıta qabyldanǵan jaǵdaıda buryn oqyǵan bilim berý uıymynyń basshysy qabyldaýshy taraptyń jazbasha suraýy negizinde bilim alýshynyń jeke is qujattaryn jiberedi, bul rette Anyqtamanyń, synaq kitapshasynyń kóshirmesin jáne jiberilgen qujattarynyń tizimdemesin ózinde qaldyrady.
21. 0qýǵa qaıta qabyldaný úshin buryn bilim alǵan bilim alýshy óziniń oqýyn jalǵastyrǵysy keletinin bildirip, bilim berý uıymy basshysynyń atyna ótinish beredi, bul rette qaıta qabyldaý týraly ótinishke Anyqtama qosa beriledi.
22. Usynylǵan Anyqtama negizinde bilim berý uıymy kýrsty jáne pánderdiń aıyrmashylyǵyn anyqtap, oqýǵa qaıta qabyldaý týraly ótinishti berilgen ýaqyttan bastap eki aptalyq merzimde qaraýy qajet.

Joǵary oqý oryndarynda bilim alýshylardy aýystyrý jáne qaıta qabyldaý
23. Aýysý nemese oqýǵa qaıta qabyldaný, eger oqý josparyndaǵy aıyrmashylyq bakalavrıat úshin mindetti komponenttiń bes oqý pánin qurasa, sol kýrsqa júzege asyrylady.
24. Bilim alýshyny kýrstan kýrsqa aýystyrýdyń mindetti sharty bilim alýshynyń joǵary oqý orny bekitken aýysý balynan tómen emes úlgerimniń ortasha balyn (GPA) jınaqtaýy bolyp tabylady.
25. Bilim alýshyny joǵary oqý oryndaryna aýystyrýdyń nemese qaıta qabyldaýdyń mindetti sharty onyń birinshi akademııalyq kezeńdi kólemi keminde 15 kredıtten turatyn jeke oqý josparyna sáıkes tolyq aıaqtaýy bolyp tabylady.
Bul rette bilim alýshy oqýdan shyǵarylǵan merzimine qaramastan kez kelgen oqytý nysanyna, kez kelgen mamandyqqa jáne kez kelgen joǵary oqý ornyna aýysa nemese qaıta qabyldana alady.
26. Bilim alýshyny aýystyrý jáne qaıta qabyldaý kezinde oqý kýrsy prerekvızıtterdi esepke ala otyryp anyqtalady. Meńgerilgen kredıtterdi qaıta esepteý tıisti bilim berý baǵdarlamasyn meńgerý úshin qajetti bilim berý traektorııasyna sáıkes júrgiziledi.
27. Pánderdegi aıyrmashylyqtardy anyqtaý kezinde qorytyndy baqylaý nysanyndaǵy aıyrmashylyq eskerilmeıdi.
Synaq bilim alýshynyń oqý jetistigin baǵalaýdyń áriptik júıesi boıynsha, eń tómengi D (1,0; 50-54%) jáne eń joǵarǵy A (4,0; 95-100%) aralyǵyndaǵy dıapazonda sáıkestendiriledi.
28. Bilim alýshyny kýrstan kýrsqa aýystyrý jazǵy emtıhan sessııasynyń qorytyndysy (aralyq attestattaý) boıynsha jazǵy semestrdiń nátıjelerin jáne alynǵan aýysý baldaryn eskere otyryp júzege asyrylady.
29. Bilim alýshyny kýrstan kýrsqa aýystyrý joǵary oqý orny basshysynyń buıryǵymen resimdeledi.
30. Belgilengen aýysý balyn jınaǵan jáne akademııalyq qaryzy bar bolǵan jaǵdaıda kelesi kýrsqa aýystyrylǵan bilim berý granty boıynsha bilim alýshy bilim berý grantyn saqtaı otyryp, akademııalyq qaryzyn aqyly negizde joıady.
31. Qaıta oqý kýrsyna qaldyrylǵan bilim berý granty boıynsha bilim alýshy osy granttan aıyrylady jáne odan ári aqyly negizde oqıdy.
32. Bilim berý granty boıynsha bilim alýshy bilim berý grantyn saqtaı otyryp basqa JOO-ǵa aýysa alady.
Jekelegen JOO-lar úshin bekitilgen memlekettik bilim berý tapsyrysy boıynsha nysanaly orynǵa, sondaı-aq bólingen kvota sheginde pedagogıkalyq mamandyqtarǵa túsken bilim alýshylardy bilim berý grantyn saqtaı otyryp basqa JOO-ǵa aýystyrýǵa jol berilmeıdi.
33. Memlekettik bilim berý tapsyrysy boıynsha bilim alatyn doktoranttar men magıstranttardy bir joǵary oqý ornynan ekinshisine aýystyrýǵa bilim berý salasyndaǵy ýákiletti organnyń memlekettik bilim berý tapsyrysyn qaıta bólýi arqyly jol beriledi.
34. Bilim alýshyny bir JOO-dan ekinshisine aýystyrý rásimi mynadaı tártippen júzege asyrylady:
1) basqa JOO-ǵa aýysýǵa nıet bildirgen bilim alýshy bilim alyp jatqan JOO basshysynyń atyna aýysý týraly ótinish beredi jáne aýysýǵa mórmen bekitilgen jazbasha kelisim alyp, qyzyǵýshylyq tanytqan JOO basshysyna ótinish bildiredi;
2) qabyldaýshy JOO basshysynyń atyna jazylǵan aýysý týraly ótinishke oqý isi jónindegi prorektor men ofıs-regıstrator qol qoıǵan, mórmen bekitilgen transtkrıpttiń; ulttyq biryńǵaı testileýdi nemese keshendi testileýdi tapsyrǵandyǵy týraly sertıfıkattyń; bilim berý grantynyń ıegeri kýáliginiń (eger grant ıegeri bolsa); oqyǵan JOO basshysynyń atyna jazylǵan ótinishtiń (basshynyń qolymen jáne mórmen) kóshirmeleri qosa tirkelýi qajet;
3) fakýltet dekany (ınstıtýt dırektory) usynylǵan qujattar negizinde salystyrý vedomosyn jasaý arqyly oqý josparyndaǵy pánder aıyrmashylyqtaryn anyqtaıdy jáne meńgergen prerekvızıtterge sáıkes oqý kýrsyn belgileıdi, bilim berý baǵdarlamasyna sáıkes meńgerilgen kredıtterdi qaıta esepteıdi jáne tirkeý bóliminiń kelisimimen bilim alýshynyń jeke oqý josparyn bekitedi;
4) fakýltet dekany (ınstıtýt dırektory), oqý bóliminiń (oqý-ádistemelik bólim nemese basqarma) bastyǵy, JOO basshysynyń oqý isi jónindegi orynbasary qoıǵan buryshtamalarǵa sáıkes JOO basshysy bilim alýshyny aýystyrý týraly buıryq shyǵarady.
35. Bilim alýshy aýysatyn JOO-nyń basshysy buıryq shyqqan kúnnen bastap úsh jumys kúni ishinde bilim alýshy buryn oqyǵan JOO-ǵa onyń jeke is qaǵazdaryn jiberý týraly jazbasha suraý jiberedi.
36. Bilim alýshy buryn oqyǵan JOO-nyń basshysy mundaı suraýdy alǵannan keıin «(JOO ataýy) aýysýyna baılanysty oqýdan shyǵaryldy» degen mazmundaǵy oqýdan shyǵarý týraly buıryq shyǵarady jáne buıryq shyqqan kúnnen bastap úsh júmys kúni ishinde bilim alýshynyń jeke is qaǵazdaryn qabyldaýshy JOO-nyń meken-jaıyna joldaıdy.
Bilim alýshy oqyǵan JOO-da transkrıpttiń kóshirmesi, synaq kitapshasy, stýdenttik bıleti jáne jiberiletin qujattardyń tizimdemesi qalady.
37. Bir JOO-dan ekinshisine bilim berý granty negizinde bilim alýshyny aýystyrý kezinde qabyldaýshy JOO-nyń basshysy bilim alýshyny qabyldaý týraly buıryqtyń kóshirmesin onyń atyna jazylǵan bilim berý granty kýáliginiń kóshirmesimen birge bilim berý salasyndaǵy ýákiletti organǵa jáne tıisti bıýdjettik baǵdarlama ákimshisine JOO-nyń qarjylandyrý kólemin túzetý úshin usynady.
38. Bilim berý granty boıynsha bilim alýshy bir JOO-dan ekinshisine bir kýrsqa tómen aqyly negizde ǵana aýysýy múmkin.
39. Bir JOO-dan ekinshisine aqyly negizde oqý úshin bilim alýshylardy aýystyrý bilim alýshy men qabyldaýshy JOO arasynda shart jasasý arqyly júrgiziledi.
40. Bilim alýshyny bir mamandyqtan ekinshisine, bir oqytý nysanynan ekinshisine aýystyrý aqyly negizde oqý úshin ǵana júzege asyrylady.
41. Bir JOO ishinde bilim alýshyny aqyly negizde bir mamandyq pen oqytý nysanynan ekinshisine aýystyrý shartqa tıisti ózgerister engizý arqyly júrgiziledi jáne JOO basshysynyń buıryǵymen resimdeledi.
42. Oqý josparlaryndaǵy pánder boıynsha akademııalyq aıyrmashylyqty joıýdyń tártibi men merzimi fakýltet dekanynyń (ınstıtýt dırektorynyń) ókimimen resimdeledi jáne aǵymdaǵy oqý jylyndaǵy bilim alýshynyń jeke oqý josparyna ornalastyrylady.
43. Oqýdyń qunyn tólemegeni úshin oqýdan shyǵarylǵan aqyly negizde oqıtyn bilim alýshy qaryzyn ótegen jaǵdaıda oqýdan shyǵarylǵan kúnnen bastap tórt apta ishinde qaıta qabyldana alady.
44. Bilim alýshylar qataryna qaıta qabyldaý jáne oqý josparlaryndaǵy pánderdiń aıyrmashylyqtaryn joıý tek aqyly negizde júzege asyrylady.
45. Oqýǵa qaıta qabyldaý rásimi mynadaı tártippen júzege asyrylady:
1) bilim alýshy óziniń oqýyn jalǵastyrǵysy kelgen JOO basshysynyń atyna qaıta qabyldaý týraly ótinish beredi. Qaıta qabyldaný týraly ótinishke Anyqtama (túpnusqa) qosa beriledi;
2) fakýltet dekany (ınstıtýt dırektory) usynylǵan Anyqtama negizinde salystyrý vedomosyn jasaý arqyly oqý josparyndaǵy pánder aıyrmashylyqtaryn anyqtaıdy jáne meńgergen prerekvızıtterge sáıkes oqý kýrsyn belgileıdi, bilim berý baǵdarlamasyna sáıkes meńgerilgen kredıt­terdi qaıta esepteıdi, tirkeý bóliminiń kelisimimen bilim alýshynyń jeke oqý josparyn bekitedi;
3) fakýltet dekany (ınstıtýt dırektory), oqý bóliminiń (oqý-ádistemelik bólim nemese basqarma) bastyǵy, JOO basshysynyń orynbasary qoıǵan buryshtamaǵa sáıkes JOO-nyń basshysy bilim alýshyny qaıta qabyldaý týraly buıryq shyǵarady.
46. Eger bilim alýshy basqa bilim berý uıymyna qaıta qabyldanǵan jaǵdaıda, bilim alýshy buryn oqyǵan JOO basshysy qabyldaýshy taraptyń jazbasha suraýy negizinde bilim alýshynyń jeke is paraǵyn jiberedi, bul rette Anyqtamanyń kóshirmesin, oqý kartochkasyn, synaq kitapshasyn, stýdenttik bıletti jáne jiberilgen qujattardyń tizimdemesin ózinde qaldyrady.
47. Oqý kezeńinde paıda bolǵan aýrý nátıjesinde berilgen mamandyqta oqýǵa tyıym salynǵany týraly dárigerlik-konsýltatıvtik komıssııanyń qorytyndysy bar bilim berý granty boıynsha bilim alýshy bir mamandyqtan ekinshisine bos oryndarǵa bilim berý granty boıynsha aýysady.