QR Úkimeti AI-80 markaly benzınin ımporttaý máselesin qarastyrýda
Aıta ketsek, buǵan deıin májilismender kóptegen janar-jaǵarmaı beketterinde AI-80 markaly benzınniń joqtyǵyn alǵa tartqan bolatyn. Olardyń aıtýynsha, birqatar kásiporyndar men azamattar AI-80 markaly benzınimen jumys isteıtin kólik quraldaryn, atap aıtqanda, ZIL, GAZ, ÝAZ, ZAZ, ERAZ, IJ markaly kólikterdi, mototsıklder men motoarbalardy, qaıyq motorlaryn paıdalanady. AI-80 markaly benzınin erkin satyp alý múmkindigi bolmasa, joǵaryda atalǵan kólik ıeleri AI-92 benzınin satyp alýǵa májbúr bolady. Al bul joǵary oktandy benzınge saı otyn júıesi men kólik quraldarynyń agregattaryn qaıta jabdyqtaýdy qajet etip, kásiporyndar men azamattardyń bıýdjettik jaǵdaılaryna nuqsan keltiredi. Osy máselege baılanysty «Halyq kommýnısteri» fraktsııasy Úkimetke shara qabyldaý qajet dep sanaıtyndaryn bildirgen edi.
Bul máselege Úkimet basshysy Baqytjan Saǵyntaev jaýap berdi.
«Qazirgi ýaqytta otandyq munaı óńdeý zaýyttaryn (MÓZ-der) jańǵyrtý jumystary aıaqtalýda. Ol jańǵyrtý jumystary benzınniń oktandyq kórsetkishterin ulǵaıtý boıynsha jańa iri tonnaly tehnologııalyq qondyrǵylardy paıdalanýǵa berýdi (ızomerleý, katalıtıkalyq rıformıng, olıgomerızatsııa), sondaı-aq joǵary oktandy benzınder komponentteriniń sapaly sıpattamalaryn eskere otyryp MÓZ-derdiń tehnologııalyq shemalaryn ózgertýdi kózdeıdi», - delingen jaýapta.
Osynyń nátıjesinde AI-92, AI-95 jáne AI-98 markaly joǵary oktandy benzınniń óndirisi retke keltiriletin bolady.
«Bul rette AI-80 markaly benzın tek Qazaqstan Respýblıkasynyń áleýetti qurylymdary úshin, atap aıtqanda, «QazMunaıGaz Ónimderi» JShS-niń arnaıy tapsyrysy boıynsha óndiriletin bolady. Ol QR Úkimetiniń 2014 jylǵy 12 jeltoqsandaǵy № 1304 qaýlysyna sáıkes, QR Qarýly kúshterine munaı ónimderin jetkizý jónindegi biryńǵaı operatory bolyp tabylady. Sonymen birge, AI-80 markaly benzınge ishki naryqtyń qajettiligin qamtamasyz etý maqsatynda Úkimet qazirgi ýaqytta ony ımporttaý máselesin pysyqtaýda. Sondaı-aq búgingi tańda AI-80 markaly benzınge bólshek saýda baǵalarynyń deńgeıi memlekettik retteýge jatatynyn jáne lıtrine 89 teńgeden aspaıtynyn atap ótemiz. Osy máseleler Úkimettiń baqylaýynda», - delingen jaýapta.
