QR UǴA akademıgi: Buzaqy topqa toıtarys berýimiz qajet
«Qurmetti qazaqstandyqtar, elimizde 2022 jyldyń alǵashqy aptasynda qııalymyzǵa kelmegen óte qıyn jaǵdaı oryn aldy. Jıylǵan topqa kútpegen jerden qosylǵan buzaqylar halqymyzdyń baılyǵyn tonap, tynyshtyǵymyzdyń talqanyn shyǵardy. Qańtardyń besinshi juldyzynda Ál-Farabı atyndaǵy Qazaq Ulttyq ýnıversıtetiniń rektory Janseıit Qanseıituly Túımebaev oqý ornynyń barlyq jaýapty qyzmetkerlerin jınap, osyndaı jaǵdaıda qalaı áreket etý qajettigi týraly óziniń úkimin bizge tanystyrǵan edi. Qazirgi tańda osyny negizge ala otyryp, belsendi túrde jumys jasap jatyrmyz. Telefon nemese habarlama jiberý arqyly barlyq stýdentterimiz ben oqytýshylarymyzǵa ahýaldy túsindirdik. Emtıhandardyń ótetin merzimin retke keltirdik. Oqý ornynyń rektory bastaǵan shtat táýlik boıy jumys isteýde. Qazirdiń ózinde ǵımaratta otyryp, oqytýshylarmen baılanysty úzgen joqpyz», dedi ǵalym. Bolathan Zaıaden ákimshilikterge shabýyl jasaý, televıdenıe ǵımaratyn órteý, bankterdi tonaý sekildi jan túrshigerlik jaǵdaı eshkimniń de oıyna kelmegenin atap ótedi. Osyǵan baılanysty Memleket basshysy Qasym-Jomart Kemeluly Toqaev halyqty sabyrlyqqa shaqyryp, qandaı sharalardy júzege asyrýymyz qajettigi jaıynda úndeý jasaǵanyn eske salady. «Búginde Prezıdentimiz demokratııalyq túrde halyq talabyna qulaq asqanyn baıqap otyrmyz. Memleket basshysynyń ekstremıstik toptardyń is-áreketine qarsy jasalǵan saıasaty jurtshylyq qoldaýyna ıe bolyp otyr. Óıtkeni buqara halyq ómirimizge qaýip tóndirip, jeke múlkimizge zııan kelitirgen jáne tynyshymyzdy buzǵan buzaqylarǵa qalaı da toıtarys berý qajettigin túsinedi. Qasym-Jomart Kemeluly aıtyp otyrǵandaı eń basty baılyǵymyz – táýelsizdigimiz, egemendigimiz. Álem kartasynda qazaq degen memlekettigimizdi saqtap qalý úshin, aqylmen, zańdy túrde maquldanǵan qadamdarǵa barýymyz qajet. Sondyqtan lańkesterdiń sumdyq is-áreketine qarsy jasalǵan sharalardy júzege asyrýǵa 100 paıyz kelisemiz. «Temirdi qyzǵan kezde soq» degen qazaqtyń danalyǵy bar. Bul sát tez arada sheshim qabyldap, áreket etetin ýaqyt. Sondyqtan halyqty sabyrlyqqa shaqyrǵym keledi. Qazir birligimizdi saqtap, elimizdiń tutastyǵyna iritki salǵan topqa qarsy turý asa mańyzdy», dedi ol.
