QR UEM jergilikti ózin-ózi basqarý júıesin odan ary damytýǵa baǵyttalǵan zań jobasyn ázirleýde

ASTANA. QazAqparat - Jergilikti ózin-ózi basqarý júıesin odan ary damytýǵa baǵyttalǵan zań jobasy ázirlenýde. Bul týraly búgin QR Ulttyq ekonomıka mınıstrligi Óńirlik saıasat jáne jergilikti ózin-ózi basqarýdy damytý departamentine qarasty basqarmanyń basshysy Marǵulan Ermaǵanbetuly málim etti.

Onyń atap ótýinshe, «100 naqty qadam» Ult josparynyń 97 jáne 98 qadamdaryn júzege asyrý aıasynda ótken jyly «Qazaqstan Respýblıkasynyń keıbir zańnamalyq aktilerine jergilikti ózin-ózi basqarýdy damytý máseleleri boıynsha ózgertýler men tolyqtyrýlar engizý týraly» Zań qabyldanǵan. Atalǵan zańǵa oraı jergilikti ózin-ózi damytý máselesi kezeń-kezeńimen júzege asyrylatyn bolady. Birinshi kezekte derbes bıýdjeti men menshigi bar aýdandyq, aýyldyq, aýyldyq okýrgtyq tolyqqandy ózin-ózi basqarý júıesi qurylady.

«QR Prezıdenti janyndaǵy Jańǵyrtý jónindegi ulttyq komıssııanyń usynystaryna sáıkes, jergilikti ózin-ózi basqarýdyń derbes bıýdjeti men menshigin qurý máselesi 2018 jyldan bastap kezeń-kezeńimen júzege asyrylady», - dedi ol.

Sonymen qatar ol elimizde jergilikti ózin-ózi basqarý júıesin odan ary damytýdyń negizgi túbegeıli baǵyttarynyń sheshimderi qarastyrylatyn zań jobasy QR Ulttyq ekonomıka mınıstrligi tarapynan ázirlený ústinde.

«Atalǵan zań jobasyn ázirleý barysynda jergilikti ózin-ózi basqarý salasyndaǵy tabysty halyqaralyq praktıkasy baıqalyp otyrǵan EYDU elderiniń tájirıbesi barynsha zerdelenedi, sonymen qatar halyqaralyq jáne otandyq úkimettik emes uıymdardyń usynystary eskeriletin bolady», - dedi M.Ermaǵanbetuly.