QR UEM «Doing Business 2018» qorytyndysynda Qazaqstannyń 1 orynǵa tómendeý sebebin túsindirdi
ASTANA. QazAqparat - QR UEM kásipkerlikti damytý departamentiniń dırektory Ǵalııa Joldybaeva «Doing Business 2018» Dúnıejúzilik banki reıtıngisiniń qorytyndysy boıynsha Qazaqstannyń 36 orynǵa syrǵyp, ótken jylmen salystyrǵanda 1 orynǵa tómendeý sebebin túsindirdi, dep habarlaıdy QazAqparat tilshisi.
Doing Business reıtıngi jyl saıyn jarııalanady jáne ol 190 memleketti qamtıdy. Memleketter reıtıngin qalyptastyrýda 10 ındıkator negizge alynady.
UEM ókiliniń aıtýynsha, «Mınorıtarlyq ınvestorlardy qorǵaý» ındıkatory reıtıngi boıynsha Qazaqstan 190 eldiń arasynda 1 oryndy ıelendi (byltyr 3 orynda bolatyn). Eki jyl boıy Qazaqstan «Kelisimsharttardy oryndaý» ındıkatory boıynsha alǵashqy ondyqtaǵy 6 orynda kele jatyr. «Menshikti tirkeý» ındıkatory boıynsha - 17 orynda jáne «Tólem qabiletsizdigin sheshý» (39-oryn), «Kásiporyndardy tirkeý» (41- oryn), «Salyq salý» (50-oryn), «Qurylysqa ruqsat alý» (52 oryn), «Elektr jelilerine qosylý» (70- oryn), «Nesıe alý» (77- oryn), «Halyqaralyq saýda» (123-oryn) ındıkatorlary boıynsha oryn alǵan.
"Ókinishke oraı,"Qurylysqa ruqsat alý" ındıkatory boıynsha byltyr 22 orynda bolsaq, bıyl 52 orynǵa deıin quldyradyq. Buǵan tekserý merzimin 68 kúnnen 123 kúnge deıin uzartý jáne protsedýralardy 13-ten 19-ǵa deıin kóbeıtý sebep bolyp otyr. "Halyqaralyq saýda" ındıkatory boıynsha 4 pozıtsııaǵa tómendep, 123 orynǵa taban tiredik. "Nesıeler alý" boıynsha - 75 orynnan 77 orynǵa, "Tólem qabiletsizdigin sheshý" boıynsha - 39 orynnan 37 orynǵa syrǵydyq.
Halyqaralyq saýda ındıkatory boıynsha kórsetkishter byltyrdan beri ózgergen joq, biraq, basqa elderdiń joǵary órleýinen Qazaqstan ustanymy tómendeı tústi. Máselen, Reseı Federatsııasy osy ındıkator boıynsha 40 orynǵa kóterildi, sáıkesinshe bizdiń ustanym 4 pozıtsııaǵa tómendedi", - dedi Ǵ.Joldybaeva Ortalyq kommýnıkatsııalar qyzmetinde ótken baspasóz máslıhatynda.
Sonymen birge, departament dırektory atalǵan reıtıngte Qazaqstannyń Italııa (46), Belgııa (52), Izraıl (54), Grekııa (67), Túrkııa (60) sııaqty EYDU-nyń elderin, sonymen qatar EAEO Keden odaǵy elderiniń arasyndaǵy reıtıngte Belarýs (38), Moldavııa (44), Armenııa (47), Qyrǵyzstan (77) elderin basyp ozǵanyn atap ótti.
