QR UEM birikken Salyqtyq jáne Kedendik kodeksti ázirleýdi usyndy
ASTANA. QazAqparat - QR Ulttyq ekonomıka mınıstri Erbolat Dosaev aldaǵy jyly Qazaqstan Respýblıkasynyń birikken Salyqtyq jáne Kedendik kodeksin ázirleý qajet dep sanaıdy. Bul týraly búgin Aqordada ótken Úkimettiń keńeıtilgen otyrysynda málim etti.
«Salyqtyq-bıýdjettik salada bastamalardy tabysty júzege asyrý úshin aldaǵy ýaqytta birikken Salyqtyq jáne Kedendik kodeksti, sondaı-aq jańa Bıýdjettik kodeksti daıarlaý usynylady»,- dedi E. Dosaev.
Sonymen qatar mınıstr servıstik ındýstrıaldy saıasatty júzege asyrýdyń tıimdiligin arttyrý maqsatynda ónerkásiptik saıasattyń janama sharalaryna ekpindi aýystyrýdy usyndy. Bul turǵyda basty róldi jeke sektor oınaıtyn bolady.
E. Dosaev ataýly memlekettik qoldaý joǵary eksporttyq áleýeti bar kásiporyndarǵa ǵana jasalatynyn atap ótti.
