QR TJM «SOS Astana balalar aýylynyń» tárbıelenýshilerin qamqorlyqqa aldy
NUR-SULTAN. QazAqparat – QR Tótenshe jaǵdaılar mınıstrligi óskeleń urpaqqa tótenshe jaǵdaılar kezindegi qaýipsizdik daǵdylaryn úıretý maqsatynda «SOS Astana balalar aýyly» jeke bilim berý mekemesiniń tárbıelenýshilerine jan-jaqty qoldaý kórsetetin bolady. Bul týraly mınıstrliktiń baspasóz qyzmetinen málim etti, dep habarlaıdy QazAqparat.
9 qańtarda Tótenshe jaǵdaılar mınıstri ıÝrıı Ilın men elordalyq TJD bastyǵy Qýanysh Bazarbaevtyń qatysýymen Nur-Sultan qalasynyń №№5 jáne 6 mamandandyrylǵan órt sóndirý bólimderinde «SOS Astana balalar aýylynyń» balalary men tárbıeshi-oqytýshylar quramy úshin ekskýrsııa ótkizgen.
«Ekskýrsııa barysynda balalar men oqytýshylar órt sóndirý, avarııalyq-qutqarý tehnıkasymen jáne jabdyqtarymen tanysty, órt sóndirý-qutqarý sporty boıynsha erler, áıelder, jasóspirimder jáne jasóspirimder qurama komandalarynyń kórsetilimderin kórdi. Bul – oqý munarasynyń 4-qabaty terezesine shabýyl satysymen kóterilý, kedergileri bar 100 metrlik jolaqpen júgirý. Qutqarýshylardan alynǵan ekskýrsııa men master-klass balalar úshin óte tanymdy jáne qyzyqty boldy.
Aldaǵy ýaqytta balalar úıiniń tárbıelenýshileri №5 mamandandyrylǵan órt sóndirý bóliminiń «Qutqarýshy» sport keshenindegi basseınge únemi baryp, qutqarýshylardan júzýdi úırenetin bolady. Sonymen qatar olar úshin ekskýrsııalar, ashyq esik kúnderi, sporttyq is-sharalar, jas qutqarýshylardyń úıirmeleri, túrli tótenshe jaǵdaılar kezindegi qaýipsiz júris-turys erejeleri men daǵdylaryna úıretý uıymdastyrylady. Bolashaqta tilek bildirgen jáne qutqarýshy mamandyǵyn tańdaǵan kezde balalarǵa azamattyq qorǵaý organdarynyń oqý ornyna túsý usynylady», - delingen QR TJM baspasóz qyzmetiniń aqparatynda.
