QR TJM sheteldik jáne otandyq týrıster úshin qaýipti marshrýttar tizbesin zańmen bekitpek

Bul týraly búgin Úkimettiń selektorlyq rejimdegi otyrysynda atalǵan vedomstvonyń basshysy Vladımır Bojko aıtty.

Mınıstrdiń aıtýynsha, jyl saıyn el aýmaǵynda joǵalǵan týrısterdi izdeýmen baılanysty qutqarý jumystary júrgiziledi. Óıtkeni Qazaqstanǵa kelgen azamattar óz betterinshe qozǵalystyń qaýipti marshrýttary boıynsha týrıstik joryqqa shyǵady. Tipti, keıde mundaı jaǵdaıdyń sońy qaıǵyly oqıǵalarǵa ulasady.

«Ótken jyly osyndaı faktiler Almaty men Shyǵys Qazaqstan oblystarynda oryn aldy», - dedi mınıstr.

V.Bojkonyń aıtýynsha, osyndaı qaıǵyly jaıttardyń aldyn alý maqsatynda vedomstvo otandyq jáne sheteldik týrıster úshin tirkelý tártibi men óte qaýipti marshýrttardyń tizbesin bekitý máselesin Týrızm jáne sport mınıstrligimen kótergen. Degenmen Ádilet mınıstrligi mundaı qujat daıyndaý atalǵan organdardyń quzyretine jatpaıtyndyǵyn alǵa tartyp, memlekettik tirkeýden bas tartqan.

«Endigi ýaqytta bul quzyrettilik «Azamattyq qorǵanys týraly» zań jobasy qabyldanǵannan keıin zańnamalyq turǵyda bekitiledi. Zań jobasyn aǵymdaǵy jyldyń qyrkúıeginde qaraý kózdelýde», - dedi ol.