QR TJM-niń áıelder quramasy órt sóndirý-qutqarý sportynan Álem chempıony atandy

SAMARQAND. QazAqparat –Órt sóndirý-qutqarý sportynan álem chempıonatynda Qazaqstannyń Tótenshe jaǵdaılar mınıstrliginiń áıelder quramasy jaýyngerlik qanat jaıý básekesinde chempıon atandy. Bul týraly QR TJM-niń baspasóz qyzmetinen málim etti, dep habarlaıdy QazAqparat.

Álem chempıonaty Ózbekstannyń Samarqand qalasynda ótip jatyr.

Jaýyngerlik qanat jaıý dıstsıplınasynda ózara myqtyny áıelderdiń 4 komandasy anyqtaǵan. Sporttyń bul túri órt ornyna kelgen kezdegi órt sóndirýshilerdiń is-áreketterine uqsas.

«Áıelder komandalary arasyndaǵy jarys Qazaqstan Respýblıkasynyń qurama komandasynyń jeńisimen aıaqtaldy. Nátıje 27,16 sekýndty qurady. Ekinshi oryndy Reseı Federatsııasynyń komandasy, úshinshi oryndy Belarýs jáne Ózbekstan Respýblıkalarynyń qurama komandalary ıelendi», - delingen TJM málimetinde.

Este salaıyq, 1 qazanda Samarqandta órt-sóndirý qutqarý sportynan erler arasynda XVII álem chempıonaty jáne áıelder arasynda VІII álem chempıonaty bastalǵan bolatyn.

Órt-qoldanbaly sportta órt sóndirýshilerdiń jeke quramynyń jaýyngerlik daıarlyǵy baıqalady.