QR TJM-nyń áskerı bólimderinde 57 almatylyq azamattyq boryshyn óteıdi
Almatyda 18 qyrkúıek — 18 qarasha kúnderi «Kúz-2023» áskerge shaqyrý naýqany ótti, dep habarlaıdy Kazinform.
Almaty qalalyq tótenshe jaǵdaılar departamentiniń málimetinshe, áskerge shaqyrylylǵan jastardyń arasynan iriktelip alynǵan 57 jasóspirim QR TJM 52859 (Qaraǵandy qalasy), 69303 (Semeı qalasy), 20982 (Aqtóbe qalasy) áskerı bólimderinde merzimdi áskerı qyzmetterin óteıdi.
Áskerge shaqyrylýshylardy saltanatty shyǵaryp salý jıyny Almaty qalasy qorǵanys isteri departamentiniń qalalyq shaqyrý pýnktinde ótti. Saltanatty sharaǵa Almaty qalasy tótenshe jaǵdaılar departamenti, Almaty qalasy qorǵanys isteri departamentiniń ókilderi, QR TJM qurmetti ardagerleri, Almaty garnızonynyń úrmeli orkestri, áskerge shaqyrylýshylardyń týystary men jaqyndary qatysyp, izgi tilekterin jetkizdi.
«Azamattyq qorǵanys áskerı bólimderi TJM jedel rezervi sanalady jáne ártúrli sıpattaǵy tótenshe jaǵdaılardy joıý jónindegi mindetterdi oryndaıdy. Áskerı bólimderde qutqarýshy-jaýyngerlerdi daıarlaý jáne oqytý úshin barlyq qajetti jaǵdaılar jasalǵan, sondaı-aq zamanaýı tehnıkalyq oqytý quraldarymen jaraqtandyrylǵan. QR TJM áskerı bólimderinde qyzmet etken sarbazdar men serjanttarǵa azamattyq qorǵaý organdaryna jumysqa ornalasý múmkindigi beriledi», — dep habarlady qalalyq tótenshe jaǵdaılar departamentiniń baspasóz qyzmeti.
Saltanatty sharanyń sońynda jergilikti áskerı basqarý organdary atynan áskerge shaqyrylýshy jastarǵa estelik syılyqtar tabystaldy.
