QR TJM Qazaqstan turǵyndaryna aýa raıyna baılanysty eskertý jasady
NUR-SULTAN. QazAqparat - «QazAvtoJol» UK» AQ jáne «Jolaýshylar kóligi jáne avtomobıl joldary basqarmasy» MM derekteri boıynsha aýa raıynyń nasharlaýyna baılanysty (qatty jel, boran, shekteýli kóriný) elimizdiń alty óńirinde respýblıkalyq jáne oblystyq mańyzy bar avtojoldarda avtokóliktiń barlyq túrlerine júrýge tyıym salyndy.
Bul týraly QazAqparat QR Tótenshe jaǵdaılar mınıstrliginiń baspasóz qyzmetine silteme jasap habarlaıdy.
Baspasóz qyzmetiniń málimetterine qaraǵanda, kólik qozǵalysy Nur-Sultan qalasy, Soltústik Qazaqstan, Aqmola, Qostanaı, Pavlodar, Qaraǵandy oblystaryndaǵy joldarda shekteldi.
Sonymen qatar «Qazgıdromet» RMK derekteri boıynsha aldaǵy kúnderi elimizdiń segiz óńirinde Nur-Sultan qalasynda, Soltústik Qazaqstan, Aqmola, Qostanaı, Pavlodar, Qaraǵandy, Jambyl, Shyǵys Qazaqstan oblystarynyń keı jerlerinde burqasyn bolyp, qar jaýady, tuman túsedi, jeldiń jyldamdyǵy sekýndyna 15-20 metrge jetedi.
«Azamattardy aýa-raıynyń ózgeristerin baqylap otyrýǵa shaqyramyz. Aýa raıyna baılanysty eskertý týraly habarlamalardy tyńdap, qajetti saqtyq sharalaryn saqtańyzdar!. Qys maýsymynda kólikpen alys joldarǵa shyqpas buryn, aýa raıy boljamyn mindetti túrde bilip alǵan jón. Eger qatty boran, burqasyn bolsa, jol keptelisinde uzaq turyp qalýyńyz múmkin. Tipti jol-kólik oqıǵasyna da tap bolýyńyz yqtımal. Eger qandaı da bir eldi mekenge shuǵyl barýyńyz kerek bolsa, dittegen jerińizge kedergisiz jetý úshin temirjol kóligin paıdalanýǵa keńes beremiz»,-delingen habarlamada.
Sondaı-aq baspasóz qyzmeti tómende keltirilgen qarapaıym talaptardy nazarda ustaýdy usynady.
Qysta jolǵa shyǵar aldynda:
1. Muqııat aýa raıy boljamyn zerdeleńiz;
2. Qozǵalys úshin qandaı joldar jabylýy múmkin ekenin anyqtańyz. Aqparatty «Qazavtojol» UK saıtynda tolyǵymen jabyq ýchaskelerdiń kartasyn kórýge bolady. Ne bolmasa biryńǵaı telefon nómiri 1403 nemese qutqarý qyzmetiniń «112» telefon nómiri, sondaı-aq «Dármen» mobıldi qosymshasy arqyly naqtylaýǵa bolady.
«112» qyzmetinen resmı aýa raıyna baılanysty eskertý alǵan jaǵdaıda eldi mekenderden jáne jolǵa shyǵýdan bas tarta turý qajet.
Shuǵyl qyzmetter avttomobılderdi lektik ilesip júrýge sheshim qabyldaǵan jaǵdaıda:
- jol qozǵalysy erejelerin saqtańyz;
- ilesip júretin shuǵyl qyzmet belgilegen jyldamdyq rejımin saqtańyz;
- ótkizý pýnktinen shyqqan avtomobıldiń artynan ilesińiz jáne ony basyp ozbańyz;
- aldynda kele jatqan avtomobıldiń arasyndaǵy qashyqtyqty saqtańyz;
- aldaǵy avtomobılderdi basyp ozýǵa bolmaıdy;
- aınalańdaǵy qozǵalysqa úlken mán berińiz.
