QR Tutynýshylar quqyǵyn qorǵaý komıteti Kókshetaýda shujyq ishinen qaýyrsyn tabylǵanyn rastady

"Saraptama Kókshetaý turǵyny ınternetke salǵan shujyqta qaýyrsyn baryn rastady. Kókshetaý qalasy turǵyndarynyń ótinishteri boıynsha júrgizilgen zerthanalyq saraptamanyń nátıjeleri Kókshetaý qalasyndaǵy «Skıf Treıd» JShS-niń «SMALL» kóterme marketinde satylyp jatqan  Astana qalasyndaǵy «Prod Company «Pyarn»  JShS-niń shujyq ónimderinde qaýyrsynnyń  bar ekendigin anyqtaǵan. 

Óndirýshi  «Prod Company «Pyarn»  JShS-ne  qatysty jospardan tys tekserýler jasaý úshin materıaldar Astana qalasy boıynsha tutynýshylardyń quqyqtaryn qorǵaý departamentine jiberildi.

Komıtet Kókshetaý qalasy turǵyndaryna talapqa sáıkes kelmeıtin ónimder týraly ýaqtyly aqparattandyrýda kómek kórsetkeni úshin alǵys bildiredi", dep kórsetilgen komıtet  saıtynda.

Eske sala keteıik, osyǵan deıin "QazAqparat" HAA tilshisi habarlaǵandaı Kókshetaý turǵyny  «SMALL» kóterme marketinen satyp alǵan shujyqtan qustyń qaýyrsynyna uqsas zat  shyqqan bolatyn.

Uıaly telefonǵa túsirilgen beınetaspada shujyq (kolbasa) satyp alǵan er adamnyń onyń ishinen qustyń qaýyrsyny men mamyǵyna uqsas zatty pyshaqpen týrap, alyp shyǵýda. Beınetaspada sóılep turǵan adamnyń aıtýynsha, ol atalǵan shujyqty Kókshetaýdaǵy «Small» kóterme saýda ortalyǵynan satyp alǵan. Ony osy beınetaspadaǵy túbirtekten anyq baıqaýǵa bolady.

«Qaıyrly tań, qazaqstandyqtar! Əsirese, kókshetaýlyqtar. Barshańyzdy ótken merekemen quttyqtaımyn. Keshe shujyq satyp alyp, odan salat jasaımyz dep sheshtik. Sosyn əıelim dúkenge baryp shujyq satyp aldy. Búgin shujyqty týrap edik, ishinen qustyń qaýyrsyny men mamyǵy shyqty. Mine, kórińizder... ...MV saýda belgisimen «mıasnye vremena» dep kórsetilgen. Dúken dırektoryna qońyraý shalyp, búkil kókshetaýlyqtardy osy shujyqpen tamaqtandyrmas úshin taýardy sóreden alyp tastaýdy ótindik. Eń qyzyǵy, shujyqtyń shyqqan jeri, ıaǵnı, rekvızıtinde «Astana qalasy, Beısembaev (Beısekbaev - red.) kóshesi» dep tur. Ol azdaı «halal» belgisin kórip turmyn. Onyń munda qaıdan kelgeni túsiniksiz. Budan keıin shujyq (kolbasa) jemeıtin bolamyn. Saq bolyńyzdar», dep turǵyndardy qulaqtandyrǵan bolatyn beınerolıktiń ıesi.

Keıin, Astanalyq "Mıasnye vremena" shujyǵyn óndirýshi ishinen qus qaýyrsyny shyqqan halal shujyǵy týraly jarııalanǵan vıdeoǵa qatysty pikirin bildirip, bul aqsha tabý úshin túsirilgen vıdeo ekenin aıtyp, aqtalǵandaı boldy.

«Biz ózimizdiń tsehta tergeý júrgizdik. Shujyqty kesip, beıne taspaǵa túsirdik, arasynda qaýyrsyn joq. Men vıdeony taratýshymen habarlastym, olar iri kólemde aqsha suraıdy. Meniń oıymsha olar bul vıdeony paıda tabý úshin túsirgen. Telefon jazbasy bizde bar. Óıtkeni, basshylyqqa, dúkenge shujyqty əkelip kórsetken joq. Oǵan qosa, olar shujyqtyń kesilgen bóligi, logotıpi bar oń jaq tusyn kespeı, logotıpi joq tusyn kesýde. Bul bizge kúdik týdyryp otyr", dep atap ótken edi «Mıasnye vremena» shujyq tsehynyń dırektory Anton Pıarn.

Alaıda, QR Tutynýshylar quqyǵyn qorǵaý komıteti búgin bul daýdyń sońǵy núktesin qoıyp, Kókshetaýdaǵy «SMALL» kóterme marketinde satylyp jatqan Astana qalasyndaǵy «Prod Company «Pyarn»  JShS-niń shujyq ónimderinde qaýyrsynnyń  bar ekendigin rastady.