QR Týrızm jáne sport mınıstri men Azııanyń Olımpııalyq Keńesiniń bas dırektory qysqy Azıada-2011 daıyndyq barysyn talqylady
ASTANA. Qyrkúıektiń 8-i. QazAqparat - QR týrızm jáne sport mınıstrliginde Azııanyń Olımpııalyq Keńesi (AOK) Úılestirý komıtetiniń 2-inshi otyrysy bolyp ótti.
Mınıstr Temirhan Dosmuhanbetov pen AOK bas dırektory Al-Mýsalam-Hýseın Astana men Almaty qalalarynda ótkiziletin 2011 jylǵy 7-inshi qysqy Azııa oıyndaryna daıyndyq barysyn talqylady, dep habarlanǵan QR TSM baspasóz aıǵaǵynda.
Otyrys barysynda qazaqstandyq tarap 2011 jylǵy Azıadaǵa daıyndyq baǵytynda atqarylyp jatqan sharalar týraly aqparat berdi, atap aıtar bolsaq, sport nysandarynyń daıyndyǵy deńgeıi, sportshylar men kórermenderdi ornalastyrý, tamaqtandyrý, olarǵa qyzmet kórsetý júıesi qarastyrylyp, qatysýshylar men qonaqtardy tirkeý, medıtsınalyq qamtý jáne Oıyndardyń qaýipsizdigi máseleleri de áńgime ózegine aınaldy. Atalyp ótilgendeı, 2010 jylǵy tamyzdyń 30-yndaǵy ahýal boıynsha 7-inshi qysqy Azııa oıyndaryna qatysýǵa 24 memleket ótinish berdi.
Otyrys sońynda taraptar AOK Úılestirýshi keńesiniń úshinshi otyrysyn ústimizdegi jyldyń qazan aıynda ótkizý týraly ýaǵdalasty.
