QR Tuńǵysh Prezıdentiniń Mýzeıinde balalarǵa arnalǵan «Astana - arman qala» merekesi ótkiziledi
ASTANA. QazAqparat - Qazaqstan Respýblıkasy Tuńǵysh Prezıdentiniń Mýzeıinde qalanyń eń kishkentaı azamattary úshin «Astana - arman qala» mýzeılik balalar merekesi ótkiziledi, dep habarlaıdy mýzeıdiń baspasóz qyzmetinen.
«Qazaqstan Respýblıkasy Tuńǵysh Prezıdentiniń Mýzeıi ashylǵan kúnnen bastap elordanyń mektepke deıingi bilim berý mekemelerimen jemisti túrde áriptestik negizde jumys jasap keledi. Mýzeıdiń bilim berý baǵdarlamasynyń osy sanattaǵy qatysýshylary úshin balalardy mádenıetke qatystyrýǵa, óz halqynyń rýhanı qundylyqtarymen tanystyrýǵa, mádenı salt-dástúrdiń jandanýyna negizdelgen «Bala jáne mádenıet» jobasy jumys isteıdi. Bul halyq shyǵarmashylyǵy, ertegiler, folklordan týyndaıdy. Balalardyń ózderin shyǵarmashylyq jaǵynan kórsetý túriniń biri - balalar merekesi. Bul búldirshinderdiń boıynda ázildi, aqyl oralymdylyǵyn, tapqyrlyǵyn damytady. Balalar merekege zor jaýapkershilikpen daıyndalýda. Birde bir mereke teatrlandyrylǵan qoıylymsyz, óleńsiz, bısiz ótkizilmeıdi. Balalardy ártistik qyrlary jaǵynan da kórýge bolady. Osynyń nátıjesinde balada sózdik qor qalyptasady, sóıleý mádenıeti damıdy, balalar arasynda shyǵarmashyl yntymaqtastyq atmosferasy ornaıdy.
Aǵymdaǵy jyly elordany týǵan kúnimen № 4 «Arýjan» bóbekter baqshasynyń tárbıelenýshileri quttyqtaıdy. «Astana - arman qala» balalar merekesi: qazaq halqynyń ertegileri men ańyzdary, Qazaqstannyń elordasy - Astana týraly, dostyq pen baqytty balalyq shaq týraly óleńder men taqpaqtardyń negizinde qurylǵan.
Balalarǵa uıymdastyrýshylar tarapynan syılyqtar men kádesyılar daıyndaldy. Іs-shara 2 shilde kúni saǵat 11.00-de ótedi», - dep jazylǵan habarlamada.
