QR Tuńǵysh Prezıdentiniń murajaıynda jetkinshekter úshin Konstıtýtsııa kúnine arnalǵan sabaq ótkizildi
Qazaqstan Respýblıkasy Tuńǵysh Prezıdentiniń murajaıynda astanalyq mektep oqýshylaryna arnalǵan tanymdyq sabaqtardy ótkizý dástúrge aınalǵan. Munda olar úshin ádettegideı ekskýrsııalar, tanymal qaıratkerlermen kezdesýler, mýzeı sabaqtary ótkiziledi. Bıyl da «Ata Zańym - táýelsizdigimniń tuǵyry» atty búgingi sabaq sol dástúrinen jańylǵan joq. Atalmysh sharaǵa mektep tabaldyryǵyn alǵash ret attaǵan birinshi synyp oqýshylary qatysty.
Jetkinshekter QR Tuńǵysh Prezıdenti N. Á. Nazarbaevtyń elimizdiń Negizgi Zańynyń jazylýy men bekitilýindegi rólimen tanysý múmkindigine ıe boldy. Olardyń nazaryna turaqty ekspozıtsııalardyń jádigerlerimen qatar, murajaı kollektsııalarynan kóptegen muraǵat qujattary men fotosýretter usynyldy. Sonyń ishinde Prezıdenttiń Konstıtýtsııaǵa óz qolymen engizgen túzetýleri men tolyqtyrýlary da bar.
Mereke qonaqtaryna arnap oqýshylar vokaldy-horeografııalyq kompozıtsııa uıymdastyrdy. Murajaıda ótken tuńǵysh sabaqtarynyń esteligi retinde balalarǵa kádesyı taratyldy.