QR Tuńǵysh Prezıdentiniń murajaıynda balalar shyǵarmashylyǵynyń festıvali ótip jatyr

Atalmysh Murajaıdyń bólim meńgerýshisi, QR mádenıet qaıratkeri Nurjamal Shyrymbaevanyń aıtýynsha, mereke «Balalyq shaqtan kózqaras» atty halyqaralyq deńgeıdegi jobanyń aıasynda ótkizilip otyr. Oǵan Balalar kórkemsýret mektebiniń 6-14 jas aralyǵyndaǵy 80-nen astam tárbıelenýshisi qatysýda. Saıys sharty boıynsha 6 jastan 8 jasqa deıingi baldyrǵandar akvagrımmen bet tatýajyn salady. 9-11 jas aralyǵyndaǵy balalar molbertte jumys jasap, Qazaqstan týraly qózqarastary men oılaryn qaǵaz betine túsiretin bolady. Al 11 jastan joǵary jetkinshekter plastmassa buıymdardy akrıll boıaýlarymen órnektemek.

«QR Tuńǵysh Prezıdentiniń murajaıy men Balalar kórkemsýret mektebiniń arasyndaǵy qarym-qatynas bes jyldan beri jalǵasyp keledi. Jyl saıyn Halyqaralyq balalardy qorǵaý kúni túrli merekelik sharalardy uıymdastyryp otyramyz. Maqsaty - balalardyń boıdaǵy talaptaryn anyqtaý, olardy shyńdaýǵa múmkindikter jasaý», - deıdi N.Shyrymbaeva.

Merekege Balalar kórkemsýret mektebiniń tárbıelenýshilerimen birge, QR Tuńǵysh Prezıdentiniń murajaıy men Astanadaǵy elshilikter qyzmetkerleriniń balalary da qatysýda. N.Shyrymbaevanyń aıtýynsha, osyndaı sharalar boılarynda tyǵylyp jatqan talanttary bar balǵyndardy anyqtaýǵa úlken septigin tıgizedi. Festıvalǵa sondaı-aq balalaryn jetektep kelgen Japonııa, Belarýs, Ýkraına jáne Polsha elshileriniń jubaılary úlken qyzyǵýshylyqpen qatysty.

Festıval sońynda eń úzdik jumystardyń avtorlary baǵaly syılyqtarmen marapattalady. Odan keıin balalar súıikti mýltfılmderin kórýge múmkindik alady.