QR Tuńǵysh Prezıdentiniń murajaıynda «Babalar amanaty» atty kórme men «Qazaqtyń dástúrleri. Náresteniń dúnıege kelýi, balalyq shaǵy jáne úılenýi» albomynyń tusaýkeser rásimi ótti

Saltanatty shara barysynda sóz sóılegen murajaı dırektory Alma Saǵynǵalı kórmeniń elimizdiń eń basty merekesi - Táýelsizdik kúnine arnalǵandyǵyn jáne  sýretter kóne muralardy jınaýshy Ulan Jákeevtiń kollektsııasynan alynǵanyn atap ótti.

«Salt pen dástúr álemniń barlyq halqynda da bar. Onda halyqtyń ádet-ǵurpy, ulttyq ereksheligi kórinis tapqan. Árbir dástúrdiń baıypty mán-maǵynasy, tereń fılosofııasy, tarıhy jáne erekshe sulýlyǵy bar. Osynyń barlyǵyn búgin tusaýy kesilip otyrǵan Eraly Ospanuly men Ulan Jákeevtiń albomynan baıqaýǵa bolady», dedi óz sózinde ol.

«Meniń qazaq halqynyń salt-dástúrlerine qyzyǵýshylyǵym erterekte oıanyp, jyldan-jylǵa ulǵaıa tústi. Keıbir dástúrlerimizdiń umyt bola bastaýy qatty tolǵandyrdy. Osyǵan oraı qazaq halqynyń salt-dástúrine qatysty HІH, HH ǵasyrlardaǵy ádebıetterdi, Keńes dáýirindegi rarıtettik kitaptardy jınastyrdym. Sondyqtan bizdiń jumysymyz shaǵyn ǵana toptyń emes, óskeleń urpaq úshin de qyzyqty bolatyndyǵyna senimdimin», dedi U.Jákeev.

Onyń aıtýynsha, qylqalam sheberiniń óner týyndylary álemge tanymal «Krıstı» aýktsıonynda usynylyp, joǵary baǵalanǵan.

Myńdaǵan jyldar boıy qazaq halqynyń ómiri men turmysyna arqaý bolǵan, salty men sanasyna baǵyt-baǵdar beretin ádet-ǵuryp, salt-dástúr sııaqty qazaqı minez ben turmys-tirshilik baıandalatyn biregeı qundylyqtardyń avtory E.Ospanulynyń aıtýynsha, kórmege qoıylǵan sýretterdi salý aǵymdaǵy jyldyń qańtar aıynda bastalyp, búgingi kúni tolyǵymen aıaqtalǵan. Kórmege qazaq halqynyń «Qyz alyp qashý», «Básire», «Shildehana», «Quda qaıtar», «Ógizge teris mingizý», «Kúıeý belgi», «Quda kúter», «Jaýshy», «Baıǵazy», «Súndet», «Ashamaıǵa mingizý», «Tusaý kesý», «Úzeńgiden ótkizý», «Itkóılek» sııaqty salt-dástúrleri beınelengen 40 keskindeme qoıylǵan. Qylqalam sheberi bolashaqta qazaq halqynyń diline, tegine, dúnıetanymyna qatysty 15 sýret salýdy josparlap otyr.

«Burynǵy ýaqytta kıiz úıde turǵan babalarymyz onyń esigin, ýyǵyn, shańyraǵyn, keregelerin, syqyrlaýyǵyn súıekteri dep ataǵan. Meniń oıymsha, osy qazaqtyń salt-dástúrleri qazaqtyń súıekteri sııaqty. Súıegimiz aman bolsa et bitedi», dedi kórmege qoıylǵan týyndylardyń avtory.

Tamyryn tereńge jiberip, bastaýyn kóne ǵasyrlardan alatyn qazaq halqynyń ulttyq mádenıeti ishki áralýandyǵymen, aıshyqtaý quraldarynyń moldyǵymen erekshelenedi.