QR Tuńǵysh Prezıdentiniń murajaıy 10 jyldyǵyn atap ótýde
ASTANA. QazAqparat - Búgin Qazaqstan Respýblıkasynyń Tuńǵysh Prezıdenti murajaıynyń 10 jyldyǵyna oraı birqatar keshendi sharalar ótkizildi.
«Búgin biz Qazaqstan Respýblıkasynyń Tuńǵysh Prezıdenti murajaıynyń 10 jyldyǵyna oraı birqatar keshendi sharalardy bastadyq. Osydan on jyl buryn Memleket basshysy bizdiń elimizdiń tarıhyna arnalǵan QR Tuńǵysh Prezıdentiniń murajaıyn qurý týraly jarlyqqa qol qoıdy», - deıdi QR Tuńǵysh Prezıdentiniń murajaıy dırektorynyń orynbasary Botakóz Qaıypova.
Olardyń alǵashqysy - «Qazirgi qoǵamdaǵy Mýzeı. Jańa damý joldaryn izdestirý» halyqaralyq ǵylymı-tájirıbelik konferentsııasy. Konferentsııa maqsaty murajaılar men ǵylymı ortalyqtar arasyndaǵy qarym-qatynasty nyǵaıtýǵa, akademııalyq jáne murajaı qaýymdastyǵyn biriktirý. Halyqaralyq ǵylymı-tájirıbelik konferentsııa jumysyna Qazaqstan Respýblıkasynda akkredıttelgen dıplomatııalyq ókildikterdiń, memlekettik organdardyń, alys jáne jaqyn shet memleketterdiń ǵylymı jáne murajaı qaýymdastyǵynyń ókilderi qatysty.
Konferentsııa aıasynda murajaı isiniń mamandaryna arnalǵan ózekti murajaı máseleleri jáne mýzeı pedagogıkasyndaǵy ınnovatsııalyq ádister týraly sheberlik-synyptar jáne «Seriktester shoqjuldyzy» mýzeılik forýmy ótkizildi.
Oǵan mýzeı seriktesteri - dıplomatııalyq ókildikter, Qazaqstannyń barlyq óńirlerinen jáne Astanadan aımaqtyq murajaı jáne mádenıet mekemeleri qatysýǵa nıet bildirgen. Forým mını-ekspozıtsııalar formatynda árbir murajaı qyzmetindegi qor jınaqtarynyń erekshelikterin, olardyń nasıhattalý ádisteri men tásilderin qysqasha ári keń túrde kórsetýge múmkindik berdi. «Seriktester shoqjuldyzy» mýzeılik forýmy Qazaqstannyń kóptegen óńirleriniń shyǵarmashyl toptaryn biriktirip, Aqtaý, Atyraý, Kókshetaý, Qostanaı, Qyzylorda, Otyrar, Pavlodar, Petropavl, Taraz, Óskemen qalalaryndaǵy mýzeılik jınaqtardyń erekshelikterimen tanysýǵa jol ashty.
Qazaqstan Respýblıkasy Tuńǵysh Prezıdenti Mýzeıiniń mereıtoıyna arnalǵan merekelik is-sharalar barysynda qonaqtar Kúmbezdi zalda ornalasqan «Bizge 10 jyl» fotokórmesi materıaldarymen tanysa alady. Úlken banket zalynda belgili músinshi N. Qalıevtyń «Aǵash qudireti» kórmesi usynylǵan.
