QR Tuńǵysh Prezıdentiniń Qory jas ǵalymdar men óner qaıratkerlerine grant tapsyrdy

dep habarlaıdy QazAqparat.

«Bul konkýrsty talantty jastar men jas ǵalymdar arasynda osymen úshinshi ret ótkizip, shyǵarmashylyq jobalardy qoldaý úshin grant jarııaladyq. Bıyl 95 ǵylymı joba kelip tússe, onyń 6-yn qarjylandyrýǵa laıyqty dep taýyp, oǵan 6,5 mıllıon teńge bólindi. Al shyǵarmashylyq jobadan 24-i keldi, onyń 5-ýin tańdap, 3,5 mıllıon teńge bóldik», deıdi atalmysh Qordyń atqarýshy dırektory Bektas Muhamedjanov.

Sondaı-aq ol Júrgenov atyndaǵy óner akademııasynyń stýdentterine osymen úshinshi jyl qoldaý kórsetip otyrǵandyǵyn aıtyp ótti. «Bıyl stýdentterdiń 9 dıplomdyq jumystaryn qarjylandyryp, oǵan 3,5 mıllıon teńge bólip otyrmyz. Ol jobalardy qarjylandyryp qana qoımaı, olardyń iske asýyna da kómektesemiz», deıdi B.Muhamedjanov.

Sonymen qatar «Qazaqfılm» stýdentterdiń shyǵarmashylyq jobalarynyń elimiz ben halyqaralyq arenalarda joǵary deńgeıde kórsetilýi úshin tehnıkalyq jáne kórkemdik jaǵynan qoldaý kórsetip otyr.

S.Amanjolov atyndaǵy Shyǵys Qazaqstan memlekettik ýnıversıtetiniń ǵylymı-zertteý basqarmasynyń basshysy, fızıka-matematıka ǵylymdarynyń kandıdaty Dosym Erbolatuly ǵylymı joba boıynsha grantty jeńip alǵan. Ol «asqynplastıkalyq rejıminde óndiriste qoldanylatyn qortpalardan kúrdeli pishindi buıymdar jasaý tehnologısyn qurastyrý» jobasy boıynsha grant ıesi bolyp otyr.

«Bizdiń maqsatymyz irgeli zertteýlerdi saqtaı otyryp, qoldanbaly ǵylymı zertteý jumystaryn damytý, tehnologııalyq zerthanany ashý, dál shtamptaý formalaryn jasaý, solar arqyly asqynplastıkalyq rejımdegi, ıaǵnı 1500-1600 paıyzǵa sozylatyn qortpalardan kúrdeli pishindi buıym jasaý. Ol buıymdardy óndiristiń ár túrli salalarynda qoldanýǵa bolady», deıdi jas ǵalym.

Sondaı-aq ol Óskemen qalasyndaǵy mashına jasaý zaýyttarymen birigip, bir jyldyń ishinde tájirıbelik konstrýktorlyq úlgini alýdy josparlap otyrǵandyǵyn jetkizdi.