QR Tuńǵysh Prezıdentiniń Qory syılyǵyna bıyl 100 jumystyń ishinen 16 joba laıyq dep tanyldy
ALMATY. 8 jeltoqsan. QazAqparat /Názıra Eleýhan/ - Almatyda Abaı atyndaǵy opera jáne balet teatrynda Qazaqstan Respýblıkasy Tuńǵysh Prezıdenti Qory syılyǵynyń laýreattaryn marapattaý rásimi ótti.
Dástúrli atalmysh syılyq ǵylym men tehnıka salasyndaǵy úzdik ǵylymı zertteýlerimen erekshelengen jas ǵalymdarǵa jáne respýblıkanyń mádenı ómirine aıtarlyqtaı úles qosyp, qoǵamda tanyla bastaǵan jas mádenıet jáne óner qaıratkerlerine beriledi.
Bıylǵy baıqaý aǵymdaǵy jyldyń qazan aıynda jarııalandy. Sol ýaqyttan beri baıqaýǵa júzge jýyq ǵylymı jáne shyǵarmashylyq jobalar usynylǵan. Olardyń ishinen tanymal ǵalymdar men mádenıet jáne óner qaıratkerlerinen quralǵan sarapshy komıssııa úzdik degen on alty jumysty tańdap aldy.
Baıqaý komıssııasy shara barysynda bıyl da jas qazaqstandyq ǵalymdardyń jumystarynyń sapasy artyp kele jatqandyǵyn jáne ǵylymı-tájirıbelik múmkindikke ıe ekendigin atap ótti. Birshama jas ǵalymdardyń zertteý jumystary halyqaralyq qazaqstandyq patenttermen qorǵalyp, jańalyq ashýǵa arnalǵan tirkeý kýálikterin ıelenip úlgergen.
Qazaqstan Respýblıkasy Tuńǵysh Prezıdenti Qory syılyǵynyń 16 jeńimpazyna tósbelgi, dıplomdar men aqshalaı syılyqtar tabys etildi.
Marapattaý rásimine Respýblıkadaǵy ǵylymı-zertteý ınstıtýttarynyń jáne joǵarǵy oqý oryndarynyń basshylary, mádenıet jáne óner qaıratkerleri, belgili ǵalymdar, Qazaqstan Respýblıkasynyń kórnekti qoǵam qaıratkerleri qatysty.
