QR Tuńǵysh Prezıdenti mýzeıiniń 10 jyldyǵyna oraı «Aǵashtyń qudyreti» kórmesi ashylady
ASTANA. QazAqparat - 25 tamyz kúni saǵat 11.00-de QR Tuńǵysh Prezıdenti mýzeıiniń 10 jyldyǵyn merekeleýge arnalǵan aǵashtan túıin túıgen sheber Nursultan Qalıevtiń «Aǵashtyń qudyreti» dep atalatyn jeke kórmesi ashylady, dep habarlaıdy murajaıdyń baspasóz qyzmetinen.
Shara mýzeıdiń seriktestik kórme jobasy aıasynda Atyraý oblystyq Sh. Sarıev atyndaǵy kórkemsýret jáne sándik-qoldanbaly óner mýzeıimen birlesip uıymdastyryldy. Mýzeıdiń mereıtoıyna arnalǵan is-sharalar barysynda atalmysh kórmeniń ótkizilýi kezdeısoq emes. «Alǵa umtylǵan Qazaqstan» jobasyna alǵash qoldaý kórsetken Atyraý oblysy óz kezeginde elimizdiń barlyq aımaqtarynan buryn kórmeler serııasyn bastap ashyp otyr. Nursultan Qalıev 1978 jyly 20 aqpanda Atyraý qalasy, Balyqshy kentinde dúnıege kelgen. Sheberdiń shyǵarmashylyqqa qyzyǵýshylyǵy jas kezinen bastalady, keıin ol aǵash óneriniń sýretshi kásibine sanaly túrde boı aldyrady. H.Dosmuhamedov atyndaǵy Atyraý memlekettik ýnıversıtetiniń «Beıneleý óneri jáne syzý» mamandyǵyn bitirgennen keıin, qoldanbaly ónerden ótkizilgen ár túrli saıystarǵa belsene qatysady.
2005 jyly Astanada «Qolóner Eýrazııa mádenıetiniń ajyramas bólshegi» festıvalinde dıplomant atanady. 2007 jyly qolóner sheberleri arasynda QR Táýelsizdiginiń 15 jyldyǵyna arnalǵan «Jeltoqsan jeli» saıysynda úshinshi orynǵa ıe boldy. Oral qalasynda «Sarqylmas saıahat - 2008» respýblıkalyq týrıstik jármeńkesine qatysyp «Úzdik týrıstik qoldan jasalǵan sývenır» nomınatsııasy boıynsha birinshi oryndy jeńip alady. 2009 jyly Aqtóbe qalasyndaǵy «Sheberler aýyly» respýblıkalyq festıvalinde «Úzdik qolóner sheberi» nomınatsııasy boıynsha ekinshi dárejeli dıplomyna ıe boldy. 2010 jyly Qazaqstan qolónershileriniń «Sheber-2010» respýblıkalyq saıysynda «Jańashyldyq» nomınatsııasy boıynsha jeńiske jetedi. Sol jyly Beket atanyń 260 jyldyǵyna oraı ótkizilgen «Oǵlandy boıaýlary» respýblıkalyq baıqaýynda birinshi oryndy; Jeńistiń 65 jyldyǵyna arnalǵan «Jeńis mamyry» saıysynda - ekinshi oryndy jeńip alady.
Nursultan Qalıevtyń týyndylary Qazaqstannyń sándik-qoldanbaly óneriniń ozyq dástúrlerin jalǵastyrýshy retinde kóptegen respýblıkalyq ujymdyq kórmelerde kórsetilip, óziniń naǵyz kórermenderin tapty. Sheberdiń alǵashqy kórmesine avtordyń sheberligi men sýretshilik óneriniń damýyn aıqyndaıtyn 59 shyǵarmasy qoıyldy. Aıta keteıik, kórme 25 qyrkúıekke deıin jalǵasady.
