QR Tuńǵysh Prezıdenti Mýzeıinde «Teńge - Qazaqstan táýelsizdiginiń nyshany» atty qor kórmesiniń ashylý rásimi ótedi
ASTANA. 31 qazan. QazAqparat - 2013 jyldyń 13 qarasha kúni saǵat 17.00-de Qazaqstan Respýblıkasy Tuńǵysh Prezıdenti Mýzeıinde Qazaqstannyń ulttyq valıýtasy - teńgeniń engizilýiniń 20 jyldyǵyna arnalǵan «Teńge - Qazaqstan táýelsizdiginiń nyshany» atty qor kórmesiniń ashylý rásimi ótedi. Bul týraly Mýzeıdiń baspasóz qyzmetinen habarlady.
Kórme QR Tuńǵysh Prezıdenti - Elbasynyń Qory jáne QR Ulttyq Bankimen birlese otyryp, QR Prezıdentiniń Muraǵaty jáne Qazaqstan Respýblıkasynyń Ulttyq muraǵatynyń qoldaýymen uıymdastyrylyp otyr.
Ekspozıtsııada Táýelsiz Qazaqstannyń ulttyq valıýtasy - teńgeniń qalyptasýy men nyǵaıýynyń 20 jyldyq tarıhyn kóz aldymyzǵa elestetýge múmkindik beretin keń aýqymdy muraǵattyq qujattar, foto jáne beıne materıaldar usynylady. Olardyń qatarynda Qazaqstan Respýblıkasynyń Tuńǵysh Prezıdenti - Elbasy N.Á. Nazarbaevtyń jeke muraǵatynan alynǵan biregeı jumys jazbalary da bar.
Kórmeniń qyzyqty jáne biregeı bolýynyń sebebi, munda alǵash ret teńge men tıyndardyń alǵashqy úlgilerinen bastap, qazaqstandyq valıýtaǵa dúnıejúzilik dańq pen halyqaralyq sarapshylardyń joǵary baǵasyn bergen ınvestıtsııalyq jáne kollektsııalyq monetalarǵa deıingi qazaqstandyq nýmızmatıkanyń tolyq toptamasyn kórýge bolatyndyǵynda.
Qazaqstan teńgesi - bul polıgrafııalyq jáne monetalyq-medalerlik ónerdiń eń jarqyn jáne este qalarlyq jaýharlary ekendigine kórme qonaqtary QR Ulttyq Bankiniń Banknot fabrıkasy men Qazaqstandyq teńge saraıynyń ónim jınaqtaryn tamashalaı otyryp taǵy bir márte kóz jetkize alady.
Atap aıtqanda, kórme eksponattarynyń arasynda «Jibek joly», «Álemniń eń kishkentaı monetalary», «Haıýandar», «Álemniń áıgili meshitteri», «Shyǵys kúntizbesi», «Sport», «Kóshpendiler altyny», «Ertede soǵylǵan monetalar», «Qazaqstannyń Qyzyl Kitaby», «Arhıtektýralyq jáne tarıhı eskertkishter», «Qazaqstan halqynyń ertegileri», «Respýblıka ıgiligi» jáne basqa da serııalardan altyn jáne kúmisten daıyndalǵan sırek ınvestıtsııalyq jáne estelik monetalardy kórýge múmkindik bolady.
Qazaqstan teńgesi basqa da nyshandarmen qatar memleket egemendiginiń shynaıy atrıbýty bolyp sanalady jáne paıda bolǵan sátinen bastap, elimizdiń ekonomıkalyq jáne áleýmettik ómirindegi barlyq synaqtardan ótip keledi. Ulttyq valıýtanyń engizilýi derbes ulttyq ekonomıka qalyptasýynyń bastamasy jáne respýblıkadaǵy naryqtyq qatynastardy qalyptastyrýdaǵy mańyzdy tetigi bolyp esepteledi.
Kórme 2014 jyldyń 20 qańtaryna deıin jalǵasady.
