QR Tuńǵysh Prezıdenti mýzeıinde «Mártebesi bıik marapattar» kórmesi ashylady
ASTANA. QazAqparat - 2015 jyly 8 maýsymda saǵat 17.00-de Qazaqstan Respýblıkasy Tuńǵysh Prezıdentiniń Mýzeıinde «Mártebesi bıik marapattar» atty Qazaqstan Respýblıkasynyń Prezıdenti - Elbasynyń qoǵamdyq marapattarynyń kórmesi ashylady. Bul týraly mýzeıdiń baspasóz qyzmeti habarlady.
Alǵash ret qalyń kórermen nazaryna Memleket basshysynyń 200-den asa qoǵamdyq marapattary usynylady. Olardyń qatarynda: «Birinshi halyqaralyq beıbitshilik syılyǵy», «Investıtsııalyq Perishte» syılyǵy, «Jyl adamy» halyqaralyq syılyǵy jáne t.b.
Tatý kórshilik pen yntymaqtastyqty damytýǵa baǵyttalǵan Qazaqstannyń halyqaralyq arenadaǵy qyzmetiniń arqasynda, Elbasymyz dúnıejúzilik qoǵamdastyq aldynda úlken syı-qurmetke bólenip otyr. Bunyń aıǵaǵy Qazaqstan Respýblıkasy Prezıdentiniń álemniń kóptegen memleketterdiń joǵary memlekettik marapattarymen qatar, halyqaralyq uıymdar tarapynan ár kezeńderde usynylǵan qoǵamdyq tanylýdyń belgileri.
Qoǵamdyq marapattar jıyntyǵy óziniń quramy jaǵynan ártúrli: ordender, alqalar, kýálikter, dıplomdar, maqtaý qaǵazdary jáne sertıfıkattar. Memleket basshysynyń qoǵamdyq marapattary - Táýelsiz Qazaqstannyń álemdik keńistikke tanylýynyń nátıjesi.
Kórmeniń maqsaty - mýzeı jádigerleri arqyly Qazaqstannyń Tuńǵysh Prezıdenti N.Á. Nazarbaevtyń jańa qazaqstandyq memlekettilik pen ashyq qoǵamdy qalyptastyrýdaǵy rólin, qoǵamdyq ómirdiń kóptegen salasyna qosqan úlesin kórsetý.
Ekspozıtsııa mynadaı taqyryptyq bólimderden turady, memleketaralyq yntymaqtastyq pen yqpaldasý salasyndaǵy marapattar; memlekettik basqarý jáne ekonomıka salasyndaǵy marapattar; qaýipsizdik, salasyndaǵy marapattar; ultaralyq jáne konfessııaaralyq kelisim salasyndaǵy marapattar; bilim, ǵylym jáne densaýlyq saqtaý salasyndaǵy marapattar; mádenıet salasyndaǵy marapattar; sport jáne týrızm salasyndaǵy marapattar kórsetilgen.
«Mártebesi bıik marapattar» kórmesi 2015 jyldyń 17 tamyzyna deıin jalǵasady.
