QR Tuńǵysh Prezıdenti Mýzeıinde «Buhar ámirligindegi bılik elıtasynyń mádenıeti» atty kórme ashylady
ASTANA. QazAqparat - Erteń, 3 qazanda Qazaqstan Respýblıkasy Tuńǵysh Prezıdentiniń Mýzeıinde «Mádenıet arqyly únqatysý» halyqaralyq jobasy aıasynda Reseı Etnografııalyq mýzeıiniń (Sankt-Peterbýrg) qor jınaǵynan «Buhar ámirligindegi bılik elıtasynyń mádenıeti» atty kórmeniń ashylýy ótkiziledi.
2014 jyldyń tamyz aıynda óziniń 10 jyldyq mereıtoıyn atap ótken QR Tuńǵysh Prezıdentiniń Mýzeıi otandyq jáne sheteldik seriktestermen tabysty shyǵarmashylyq baılanystardy damyta otyryp, táýelsiz Qazaqstannyń jetistikteri men mádenı murasyn nasıhattaýshy mádenı yntymaqtastyqtyń áıgili ortalyǵy bolyp tabylady, dep habarlaıdy atalmysh murajaıdyń baspasóz qyzmeti.
Reseı Etnografııalyq mýzeıiniń negizi 1902 jyly III Aleksandr patshanyń Orys mýzeıindegi Etnografııalyq bólimi retinde qalandy. Qazirgi tańda REM - Eýrazııa halqynyń dástúrli eskertkishterin zertteıtin jáne saqtaıtyn álemdegi eń iri etnografııalyq mýzeılerdiń biri. Mýzeı jınaǵynda zor ǵylymı jáne estetıkalyq qundylyǵy bar 500 000-nan astam jádiger bar: HVIII-XX ǵasyrlardaǵy turmystyq buıymdar, negatıvter, fotobasylymdar, sýretter, keskindemeler. Bul jerde Shyǵys Eýropa, Kavkaz, Sibir jáne Ortalyq Azııa halyqtarynyń etnografııalyq materıaldary ornalasqan.
Uly jibek joly - 1,5 myń jyldaı san alýan mádenı ortalyqtar men qurlyq órkenıetterin - Ejelgi Qytaı terrıtorııasynan Batys Eýropanyń qıyr-shyǵysyn toǵystyrǵan Eýrazııa mádenı keńistiginiń tarıhyndaǵy fenomen bolyp tabylady. Uly jibek joly arqyly adamzattyń ortaq murasyna aınalǵan ártúrli baǵyttaǵy san alýan mádenı qundylyqtar jetkizilip, ilgeri órleı tústi. Uly jibek jolynyń turaqty jumysyn qamtamasyz etýde jol torabynda ornalasqan memlekettik qurylymdar úlken ról atqardy. Óz kezeginde, Uly jibek jolynyń eýrazııalyq ekonomıkalyq-saıası úderisterge yqpal etýinen olar ózderiniń damýyna qýatty yntalandyrýǵa ıe boldy.
Kórmeniń negizgi maqsaty - kelýshilerdi Orta Shyǵystyń eń mańyzdy saıası ortalyqtarynyń biri - Buhar ámirliginiń bılik elıtasynyń sýbmádenıetimen tanystyrý. Bılik elıtasy kóp eńbekti qajet etetin qymbat buıymdardyń negizgi tutynýshysy boldy: saltanatty kıimder, at-ábzelderi, zergerlik áshekeıler. Bul zattardyń mańyzdy bóligi dıplomatııalyq syıǵa arnalǵan. Mundaı biregeı zattardyń úlgileri kásibı etnograftardyń búgingi kúnge deıin uzaq ári maqsatty túrde júrgizgen jumystarynyń nátıjesinde saqtaldy. Kórmeniń zattyq kesheniniń baılyǵy jáne tutastyǵy XIX ǵasyrdaǵy bılik elıtasy ókilderiniń ómirindegi ártúrli kórinistermen tolyq kólemde tanysýǵa múmkindik beredi. Sondaı-aq ekspozıtsııada sán-saltanat jáne kıim, mýzykalyq aspaptar jáne ıslamdyq ǵıbadat zattary, sherýlik qarý-jaraqtar jáne at jabdyǵy, aýshy qustarmen ań aýlaý kórinisteri usynylady.
«Buhar ámirligindegi bılik elıtasynyń mádenıeti» kórmesi 31 qazanǵa deıin jalǵasady
