QR Tuńǵysh Prezıdenti murajaıynda qazaqstandyqtardyń fashızmdi talqandaýǵa qosqan úlesi týraly aıtyldy

ASTANA. 3 mamyr. QazAqparat - QR Tuńǵysh Prezıdenti murajaıynda Uly Otan soǵysyndaǵy Jeńistiń 68 jyldyǵyna arnalǵan sabaq-kezdesý ótti, dep habarlaıdy murajaıdyń baspasóz qyzmetinen.

Uly Jeńis tarıhyndaǵy erlikti, fashısterdi talqandaýdaǵy qazaqstandyqtardyń úlesi jóninde oqýshylarmen birge eske ala otyryp, uıymdastyrýshylar óz aldyna týǵan eldiń tarıhyna qurmet, otanshyldyq sezimin, batyrlar úshin maqtanysh sezimin qalyptastyrýdy maqsat etip qoıdy. Іs-sharaǵa №22 mekteptiń oqýshylary qatysty. Sabaqqa erekshe bólimi qurmetti qonaq retinde soǵys ardageri, Ýkraına, Moldava, Rýmynııa, Polsha, Germanııa maıdandarynda erlikpen shaıqasqan Anatolıı Nıkıforovıch Kýropıatnık shaqyryldy.

1944 jylǵy qańtar aıynan bastap, 16 jasynda Anatolıı Nıkıforovıch 5-Gvardııalyq áskerdiń Gvardııalyq áýe-desanttyq atqyshtar polkiniń quramynda soǵysty. Óziniń tilek sózinde ardager oqý jáne óz bilimin tolyqtyrý qajettigin erekshe atap aıtty. Qazaqstan Prezıdenti N.Á.Nazarbaev atap kórsetkendeı: «Biz ótken soǵysta jeńiske jetken atalar men ákelerdiń urpaǵymyz», jáne bizdiń mindetimiz sol Uly Jeńistiń baǵasyn esten shyǵarmaý.