QR Tuńǵysh Prezıdenti murajaıynda belgili músinshi Marat Ǵabdyrahmanovtyń «Ómir pernesi» atty jeke kórmesi ashyldy

Shaǵyn úlgidegi músinder janrynda jumys isteıtin ol óziniń týyndylaryna tereń fılosofııalyq mán-maǵyna syıǵyza otyryp, halqynyń jan-dúnıesiniń qupııaly tereń pernelerin názik jetkize bilgen. «Búgingi kórmege ózimniń úzdik týyndylarymnyń 25-in usynyp otyrmyn. Ádil baǵasyn kóziqaraqty kórermen berer», deıdi M.Ǵabdyrahmanov.

Kórmege qoıylǵan músinshiniń týyndylary kórermenniń boıyna ony aınala qarap, onyń úsh ólshemdiligin sezingisi keletin tilegin oıatady. Avtor adam beınesi arqyly qoǵam ómirin, adamdardyń minez-qulqyn, olardyń kóńil-kúıin, is-áreketterin shynaıy asha túsken.

M.Ǵabdyrahmanov 1970 jyly Aqtóbe qalasynda dúnıege kelgen. Jubanov atyndaǵy Aqtóbe memlekettik ýnıversıtetin bitirip, eki jyl AQSh-ta taǵlymdamadan ótken. Onyń «Dóńgelek» músindik kompozıtsııasy 2006 jyly Ekaterınborda ótken halyqaralyq saıabaq músinderi baıqaýynda úshinshi dárejeli dıplommen marapattalǵan.

Músinshiniń týyndylary tek Aqtóbe qalasyndaǵy murajaıda ǵana emes, sonymen birge AQSh, Germanııa, Frantsııa, Qytaı azamattarynyń jeke kollektsııasynda saqtaýly.