QR Tuńǵysh Prezıdenti kúnine oraı alpınıster «Nursultan» shyńyna kóterildi

ALMATY. QazAqparat - QR Táýelsizdiginiń 25 jyldyǵy jáne QR Tuńǵysh Prezıdenti kúnine oraı Alpınızm jáne quzǵa sporttyq órmeleý federatsııasynyń uıymdastyrýymen alpınıster Іle Alataýynyń áıgili shyńy «Nursultan» bıiktigine kóterildi, dep habarlaıdy «QazAqparat».

Merekege oraı jasalǵan sportshylardyń erekshe tartýyna qatysty búgin Almatyda arnaıy baspasóz máslıhaty uıymdastyryldy. Baspasóz máslıhatynda sóz alǵan Alpınızm jáne sporttyq quzǵa órmeleý federatsııasynyń prezıdenti Qazbek Valıev sportshylardyń taýǵa sapary týraly aıtty.

 

«27 qarasha kúni 64 adamnan turatyn alpınıster toby El Táýelsizdiginiń 25 jyldyǵy men QR Tuńǵysh Prezıdenti kúnine arnap, «Nursultan» shyńyna kóterilýge attandy. Qar qalyń jaýǵan, aýa raıy -27 gradýsqa deıin tómen bolýyna baılanysty olardyń barlyǵyna bıikke shyǵa almady. 42 adam ǵana dittegen mejege kóterile aldy. Óte sýyq boldy. Bizdi QR Prezıdenti Apparaty, Almaty ákimdigi, QR Mádenıet jáne sport mınıstrligi Sport jáne dene shynyqtyrý isteri komıteti qoldady. «Nursultan» shyńy Bogdanovıch muzdyǵynyń bas jaǵynda ornalasqan. Soltústiginde Qarlytaý, shyǵysynda Arıstov shyńymen ulasady. Bul shyńǵa 1930 jyly 17 shildede G.Beloglazov bastaǵan top shyǵyp, Kishi Almaty shyńy dep ataǵan. Dál osy jyldy Qazaqstan alpınızminiń bastaýy dep eseptegen. Al 1935 jyly 11 shildede Almatyda 1-Komsomoldyq alpınıada ótip, Kishi Almaty shyńy «Komsomol» ataýyna aýystyryldy. 1997 jyly alpınıadaǵa qatysýshylar Tuńǵysh Prezıdenttiń týǵan kúnine oraı Komsomol shyńyn «Nursultan» shyńy dep ataýdy usyndy. «Nursultan» shyńynda dástúrli alpınıadanyń san túrli jarystary ótkiziledi. Qazaqstannyń táýelsizdik alýymen estafetany qazirgi alpınıster jalǵastyryp otyr», - dedi Q.Valıev.

Aıta keteıik, «Nursultan» shyńynyń bıiktigi 4376 metr.